Plattdeutsche Nachrichten

De Plattdüütschen Nahrichten vun'n 22. Mai 2012

Plattdüütsch Nahrichten vun'n 22. Mai 2012, [3:22]

Altmaier up Röttgens Posten

Berlin: De Bunnsregeern kriggt vundag een niegen Ümweltminister. Bunnspräsident Gauck gifft hüüt vörmiddag in dat Slott Bellevue dat Bahntje an Peter Altmaier. He is bitto den parlamentarschen Geschäftsföhrer vun de Unionsfraktschoon. Altmaier kümmt up den Posten na den CDU-Politiker Röttgen. Bunnskanzlersche Merkel harr Röttgen na den sien Wahlslamassel in NRW ut sien Amt jaggt. Altmaier kennt bit nu hento nich veel vun Ümweltpolitik, man de Energiewenn schall he dörsetten.

Eer hett düchtig beevert

Sofia: In Bulgarien hett hüüt Nacht de Eer düchtig bevert. Dor hett een Knööv vun 5,8 achtersetten. De Midd vun dat Bevern liggt blots sowat fiefuntwintig Kilometers vun de Hauptstadt Sofia vun af. Doden hett dat woll nich geven. Ok in Italjen bliff de Eer nich stillkes. Verleden Nacht hett se jümmer weer nabeevert. Vör twee Daag hett dat in Norditaljen een Bevern geeven un dorbi sünd söben Minschen dootbleven.

Minnverdeeners arbeit toveel

Berlin: Veele Lüüd, de man minn verdeent, arbeit bannig veel Stünnen för ehr Överleven. Een Veertel vun de Lüüd, de nich veel Geld verdeent, arbeit föfftig Stünnen in de Week of gor mehr. So steiht dat in de "Berlinsche Zeitung" un de hett dat vun een Unnersöken vun dat Düütsche Institut för Wertschuppsforsken. Wieder is rutkamen, wat Kraftföhrers, Lagerarbeiters un Lüüd, de in Kröög un Wertschuppen arbeiten doot, wat de faken lange Deenst doon mööt. Dörgahns is dat so, dat Minnverdeeners mit een Ganzdagsarbeit twee Stünnen mehr arbeit as annern, de 'n heelen Dag werkt.

Deepermaken vun de Werser

Bremerhaben: Dat Bunnsverwaltengericht will sick hüüt sülven dat Deepermaken vun de Werser ankieken, vunwegen söben Klagen tegen de Saak up'n Disch liggt. Klaagt hebbt Buern, de Gemeende Stadland, den Ümweltkring BUND un de Werser-Anliggers Kronos Titan un de Fassmer-Warft. De Richters willt nu vun'n Schipp ut de Laag up de Buten- un Unnerwerser in't Oog nehmen. De Lüüd, de dortegen sünd, dat de Werser deeper maakt warrt, de sünd bang, dat dat Water mehr Solt kriggt un dat dat nich mehr seeker is mit Hoogwater.

Swedsche Prinzess warrt döfft

Stockholm: In de swedsche Haupstadt warrt hüüt Middag Prinzess Estelle döfft. Dat is dat erste Kind vun Kroonprinzess Victoria un Prinz Daniel un dat erste Grootkind vun Könnig Carl Gustav un Könnigin Silvia. Et is an'n 23. Februar up de Welt kamen un kümmt nu achter sien Mudder up'n tweeten Platz in dat Töven up de Kroon in Sweden. To de Dööp warrt woll sowat fiefhunnert Lüüd in de Slottkark kamen.

Dat Weer

Un so is dat Thermometer all kladdert: an de Fiskereehabenslüüs in Bremerhaben up achtteihn, in Willemshaben up negenteihn, an'n Bremschen Fleegerhaben up twintig un in Veern is dat all dreeuntwintig Grod warm. Hüüt gifft dat bian Floorwulken veel Sünnschien. Blots an'n Namiddag kaamt vun Süden her mehr Wulken up. Dat schall aber drög blieven. Bi achtuntwintig bit dörtig Grod weiht de Wind mau of mit Maten ut de Richt Ost, tegen Abend dreiht he up Nordost. Tokamen Nacht blänkert de Steerns bi sowat veerteihn Grod. Morrn is dat ok weer drög un de Sünn schient un schuern of grummeln deit dat woll ehrder nich. Bi söbenuntwintig Grod weiht denn de Wind toerst mau, later mit Maten ut de Richt Nordost. An'n Donderdag veel Sünnschien bi fiefuntwintig Grod. Dat weern de Narichten. Katrin Martens hett se tohoopstellt. Up Platt trechtmaakt un vörleest hett se Gesine Reichstein.