Plattdeutsche Nachrichten

De Plattdüütschen Nahrichten vun'n 8. Februar 2012

Plattdüütsch Nahrichten vun'n 08. Februar 2012, [3:04]

US-Regeern denkt över'n Angriff op Syrien na

Washington: As de Senner CNN mellt, plaant dat US-Verdeffenderens-Ministerium möögliche Vörhebben in Syrien. De Oppositschoon har de US-Regeern vördem all opföddert, dat se jem Wapens na Syrien levern schölln. De Kämpfe twüschen Regeerens-Truppen und de Gegners vun Präsident Assad gaht ünnerdess wieter. Opstunns versocht de Armee, den Opstand in de Stadt Homs daal to slaan.

Ex-Senater Santorum  mischt de US-Vörwahlen op

Washington: De republikaansche Ex-Senater Santorum het verleden Nacht unverwachtens de Vörwahlen in de Buunsstaaten Minnesota, Missouri un Colorado wunnen.  Santorum het sick darmet gegen Romney dörsett, de betherto vörn leeg. Darmet schient dat nu wedder ganz un gar apen to wesen, keen vun de Republikaaners tokamen Harvst gegen US-Präsident Obama antreden ward.

Ies-Schollen hebbt Binnenschipp ramponeert

Braak:  Dat lett so, as wenn Ies-Schollen gistern avend een Lock in een Binnenschipp op de Werser bi Braak reten hebbt un dardör Water in dat Schipp indrungen is. Dat mellt de Waterschuul-Polizei. De Füürwehr het met starke Pumpen verhinndert, dat de Frachter ünnergahn is. Dat Schipp is met twee Slepers in den Binnenhaben vun Braak sleept worrn. De Kaptein un sien Familie hebbt nix afkregen.

Fleegers sünd ünnerwegens na Spiekeroog

Spiekeroog:  Vun Klock ölben af an sünd Helikopters twüschen Spiekeroog un Neeharlingersiel ünnerwegens. Vunwegen dat  dicke Ies gifft dat keen anner Schangs, na de Insel hen- oder dar wegtokamen. Dat Fährschipp, dat gistern met 35 Lüüd na Neeharlingersiel woll, het wedder ümkehren möß. Darmet de Urlaubers nich noch länger fastsitt, het de Kurverwalten Helikopers insetten laten.

CDU föddert Antwoort

Bremerhaben:  De CDU föddert, dat de Gesundheits-Utschuß sick in een Sonnerdrepen darmet utenannersett, dat Drogen in de Hoor vun Kinner funnen worrn sünd. Verleden Week is bekannt worrn, dat vun 24 Kinner, de ünnersocht worrn sünd, 17 Sporen vun Drogen in jemehr Hoor harrn. Ut Sicht vun de CDU har dat all veel ehrder faststellt weern möß.

Dat Weer

Un woans süht dat met dat Weer ümto ut? An'n Bremer Flooghaben wiest dat Thermometer opstunns 2 Grad ünner null, an de Fischereehaben-Slüüs Bremerhaben un in Wittmund 3 Grad ünner null un in Cuxhaben 4 Grad ünner null. Vondag fallt verenkelt 'n beten Snee. Dagsöver lockert de Wulken op, un denn kickt ok maal de Sünn rut. Dat Thermometer stiggt nich höger as een Grad ünner null, un de Wind weiht swack oder met Maten mit dree bet veer ut de noord-oosten Kant. Tokamen Nacht treckt wedder mehr Wulken ran un denn fallt Snee. Dat Thermometer sackt op dree bet sess Grad ünner null. Morn gifft anfangs enkelte Snee-Schuur. Nahmdags blifft meist dröög, un af un an kickt de Sünn denn maal rut. De Temperaren liggt bi null Grad. Freedag schient de Sünn bi veer Grad ünner null. Dat weern de Nahrichten. Michael Nenza het se tohoopstellt. Op platt trechtmaakt un vörleest het se Marianne Kozlowski.