Plattdeutsche Nachrichten

De Plattdüütschen Nahrichten vun 'n 3. Februar 2012

Plattdüütsch Nahrichten vun'n 3. Februar 2012, [3:24]

In Ägypten maakt de Lüüd wiederhen Krawall

Kairo: Hüüt Nacht sünd Lüüd, de an 't Lawayn weern un Gendarms wedder op'anner loosgahn. Dor sünd tominnst twee Minschen bi dootbleven, 'n paar Hunnert sünd versehrt worrn. Alleen in Kairo weern üm un bi teihndusend Lüüd vör dat Huus vun dat Binnenministerium bi'nanner kamen un hebbt demonstrert. Se hebbt de Polizei böös op 'n Kieker. De Lüüd op de Straten sünd vun Meenen, dat dat so slimm malöören dee, na dat Footballspeel in Port Said, an 'n Avend vun Middeweken, dor hebbt de Gendarms düchtig Schuld an. Mehr as söbentig Minschen weern na dat Speel to Doot kamen.   

De Lüüd seht Bundspräsident nich mehr so goot an  

Berlin: Welk vun de ARD hebbt Lüüd befraagt, wat Bundspräsident Wulff beter vun sien Amt Afscheed nehmen  schall, jo oder nee. Veerunfofftig Perzent vun de Düütschen sünd vun Meenen, weer goot, wenn Wulff sien Hoot nimmt. Dat sünd nochmaal acht Perzentpünkt mehr as in 'n Januar. Mit de Arbeit vun 'n Bundspräsident tofreden, je, dat sünd bloots noch dreeundartig Perzent vun de Lüüd in Düütschland.

Weniger Gas uut Russland

Moskau: De Firma Gazprom, de in Russland den Hannel mit Gas ganz alleen kuntelert, levert 'n Drüddel weniger Gas na Europa, as se dat eens uutmaken deen. Dat markt amenn de Ünnernehmen, de in Düütschland, Österriek, Italien un de Slowakei Gas na de Hüüs vun elk un een henbringt. Man se sään överall, wi hebbt heel noog Gas in de Achterhand. Groote Rohren, de vun Russland uut na Europa hen föhrt, löppt över dat Flach vun de Ukraine. In Russland smieten se de Lüüd in de Ukraine vör, se nehmt vun dat Gas mehr bisiet, as dat vörsehn is un se amenn denn ook betahlt.   

Spoor vun Drogen ook bi Kinner in Bremerhaben

Berlin: Facklüüd vun de Charité hebbt ook bi Kinner uut Bremerhaben in de ehr Hoor Drogenkraam funnen. Bi teihn vun de Lütten is de Weert veel to hooch. Bi de Stadtverwalten hebbt se vermellt, Richters sünd verlagen, düsse Kinner mööt stantepe ruut uut ehr Fomiljen, dat se in Tokunft schuult warrt.     text

Staatsanwalt maakt wat över de Liek vun 'n Fru bekannt

Bremen: In 'n Stadtdeel Vahr hebbt Gendarms güstern laat 'n Namiddag en fievuntwintig Johren oolt Fru doot in ehr Wahnen funnen. De Lüüd, de allens ünnersöken deen, sünd vun Meenen, de Fru hett een mit Gewalt bisiet bröcht, dat is 'n Verbreken ween. Wo dat passert is un wat se bet nu ruutfunnen hebbt, dat wüllt se bi de Staatsanwaltschop noch hüüt an 'n Vörmiddag bekannt maken.

Dat Weer

Un ditt noch vun 't Weer: Bi 'n Flegerhaben Bremen un in Achem wiest dat Thermometer opstunns minus söss Grod, in 'n Noornhamm negen. Vundagen eers düüster Wulken un Sneeschuer. An 'n Namiddag warrt dat wat lichter, veel lachen Sünn un dröög, minus fiev bet minus dree Grod. Tokamen Nacht kloren Heben, bet minus twölf Grod. Morgen meist överall fein Weer, minus fiev Grod, üm un bi. An 'n Sünndag lachen Sünn, bet minus veer Grod. So wiet Nahrichten op Platt, trechtmaakt vun Gabriele Intemann. Plattdüütsch trechtböögt un vörleest hett se Ulf-Thomas Lesle.