Plattdeutsche Nachrichten

Plattdüütsch Nahrichten vom 8. Februar 2010

Plattdüütsch Nahrichten vom 8. Februar 2010, [4:38]

Mehr Laways för Wahrschuu

Hannober: In mehrere Bunnslänner gaht hüüt de Laways för Wahrschuu bi den Deenst för Jan un alleman wieder. In'n Norden geiht dat vör allen vundag tokehr. Bian anner Steden gaht de Lüüd in Hamborg, Sleswig-Holsteen un Neddersassen up de Straat. Lawayen doot se to'n Bispill in Krankenhüüs, in Kinnergoorns un ok bi Busse un Bahns. Anfungen hebbt hüüt de Mitarbeiters vun de Üstra-Verkehrbedrieve in Hannober. Dor fangt in goot 'n Stünnenstiet dat grote Tohoopkamen up de Straat vun de Gewarkschupp ver.di an. Dorhen kaamt bian den Baas vun ver.di, Bsirske ok dusende vun Lüüd, de in'n Nordwesten arbeit. Mit dit Laway för Wahrschuu willt se pramsen för de nöchsten Verhanneln över Tarife, wat övermorrn anfangt. De Mitarbeiters in'n Deenst för Jan un alleman in de Gemeenden un'n Bund verlangt bian anner Saken fief Perzent mehr Geld in de Knipp.

Twee Doden na Fründschuppsstriet

Bremen: In'n Stadtdeel Habenhusen is eene junge Fru dootschaten worrn un dat woll vunwegen in een Fründschupp de een mit de anner nix mehr to doon hebben wull. De Polizei geiht dorvun ut, wat de mal wesen Fründ vun de Fru dat nich hett verknusen kunnt, wat se ehr weglopen weer. De Polizei meent, dat Spill is so aflopen: De Mann hett güstern Nahmiddag an't Huus vun de Achtteihnjöhrige pingelt. As de Dör losgüng, is he na baben birst, hett de Fründin söcht un se denn daalschaten. Denn hett de Mann up de Moder vun de Fru un denn sick sülven in'n Kopp schaten. De beiden sünd swaar an't Liev versehrt worrn un de Mann is vunnacht in't Krankenhuus dootbleeven. De Polizei hett em all keent vunwegen he all anner Saken verbraken harr.

Mit de Arbeitskuntors bold eenig

Berlin: Woans Lüüd in de Gemeenden betüdelt warrt, de all länger keen Arbeit mehr hebbt, dat kümmt nu in'n Gang. De Union hett güstern Abend wat rutklamüstert, wo se in'n Bund un de Länner mit inverstahn sünd. De Baas vun de Länner, wo de Union dat Seggen hett un Bunnsarbeitsministersche von der Leyen willt dat Grundgesett ännern un denn köönt se de Lüüd, de all länger keen Arbeit mehr hebbt, in de Arbeitskuntors wieder helpen as bitto. In'n Bunnsdag mutt de SPD "jo" dorto seggen un von der Leyen will mit de Partei verhanneln. Bit nu hento sünd för de Arbeitskuntors un dormit ok för Minschen ahn Arbeit de Geemenden, man ok de Bunnsagentur för Arbeit tostännig. Dat Bunnsverfatengericht harr urdeelt, dat weer tegen de Verfaten, wat dor beid Steden de Fingers middenmang hebbt un verlangt, dat schull bit to't Enn vun dit Johr nie regelt warrn.

IG Metall verlangt nix Genaus

Hamborg: De IG Metall warrt in de Tarifrunn för düt Johr nix Genaus anseggen, wat se mehr an Lohn hebben will. De Baas vun de Gewarkschupp, Huber, de hett an dat Blatt "De Welt" seggt, an erste Stee müss stahn, wat de Arbeitssteden bit 2012 un wat de würkelken Löhn seeker sünd. In de Metall- un Elektroindustrie is verleden Johr bannig minner produzeert worrn, warrt seggt, üm een Drüddel. De IG Metall seggt, de Arbeitssteden weern man üm fief Perzent minner worrn, vör allen vunwegen de Regels för Kottarbeit. De Gewarkschupp is bang, wat up ehr Rebeet mehrere hunnertdusend Arbeitssteden verlaren gahn kunnen.

Wahl in de Ukrain

Kiew: Lett so, as wenn bi de Präsidentenwahl in de Ukrain de Baas vun de Oppositschoon, Janukowitsch, wunnen hett. He steiht dorvör, fründlick to Russland to wesen. Knappan all  Stimmen sünd uttellt un he hett dree Punkte mehr as de Baassche vun de Regeern, Timoschenko. Janukowitsch hett vun sick ut all seggt, he hett wunnen un hett vun Timoschenko verlangt, se schull dat bigeven un vun ehren Posten gahn. Timoschenko smitt up de anner Kant Janukowitsch vör, he harr mit smerige Poten in de Wahl ingrepen. De Wahlkommischoon in Kiew un Lüüd ut'n Westen, de de Wahl in't Oog nahmen hebbt, de seht aber nix, wat verkehrt lopen weer. De Ukrain deelt sick in twee Lagers: een för den Westen un de steiht för Timoschenko un een in'n Osten un Süden vun dat Land, un dor mögt de Minschen Janukowitsch lieden.

Dat Weer

Un so leeg is dat Thermometer sackt: an de Fiskereehabenslüüs in Bremerhaben, an'n bremschen Fleegerhaben, in Cuxhaben un ok in Vechte na fief Grod unner null. Hüüt is dat wulkendüster of gries un hier un dor kann 'n beten Snee sieseln. Bi veer Grod unner null weiht de Wind man mau ut de Richt Ost bit Südost mit een Knööv vun dree. Tokamen Nacht blifft dat gries un verenkelt sieselt ok weer Snee bi söss Grod unner null. Morrn weer een wulkendüstern Heben, wo de Sünn nich recht dörküümt un verenkelt Pieselsnee bi veer Grod unner null. Vun Middeweeken bit Freedag kaamt Sünnenstrahlen nich faken dör de Wulken, af un an snejt dat 'n beten un dat is glatt bi dree bit een Grod unner null. Dat weern de Narichten. Severino Melchiorre hett se tohoopstellt. Up Platt trechtmaakt un vörleest hett se Gesine Reichstein.