Plattdeutsche Nachrichten

De Plattdüütschen Nahrichten vun'n 21. Februar 2012

Plattdüütsch Nahrichten vun'n 21. Februar 2012, [2:54]

Grekenland kriggt Rettungspaket mit Milliarden

Brüssel: Dat twete Hölpspaket för Grekenland is trecht. 130 Milliarden Euro sünd dor binnen. De Finanzministers vun de Euro-Länner harrn lang hen un her verhannelt, man fröh an'n Morgen sünd se op een Brett kamen. De Regerung in Athen mutt dorför op kloren Kurs sporen, sporen, sporen.

Streik an'n Flegerhaven löppt bet Freedag

Frankfort: De Streik an den Rhein-Main-Flegerhaven löppt wieder bet Freedagavend. Egentlich wullen de Mitarbeiters op't Vörfeld morgen wedder an de Arbeit gahn. Nu hett de Gewarkschaft fastleggt: se streikt för en längere Tiet. Ok Bremen kriggt dor wedder wat vun af. Mehrere Törns vun un na Frankfort hebbt se vun den Plaan afsett.

Bremer Kinner warrt bald beter oppasst

Bremen: De Lannsregerung hett seggt: Ja, Kinner schüllt över Dag beter oppasst warrn. Bet Sommer wüllt se knapp 1200 Kinnergoorn-Kinner mehr opnehmen. Dat Geld, wat se bavento bruken doot, will sik Root-Gröön vun de Öllern halen – je na dat Inkamen mehr oder weniger.

Eurogate verleert vör't Landgericht

Ollenborg: Eurogate hett sik vör't Landgericht nich mit en Verfögen, dat eerstmal gellen schull, gegen de "JadeWerser Port Realisationsgesellschaft" dörsetten kunnt. Eurogate wull weniger an Afgaven för Scheep betahlen, de in'n Haven liggt. Dat Unnernehmen weer dor nich mit inverstahn, dat dat Havengeld in Willemshaven meist dubbelt so hooch ween schall as in den eersten Verdragsplaan mit de JadeWerserPort binnen stunn. Dat Gericht seggt aver: Dat köönt se nich bewiesen.

SPD klaagt vör Staatsgerichtshoff

Hannover: De SPD in Neddersassen leggt vundaag en Klaag gegen de Lannsregerungen vun fröher un vun nu op'n Disch. Se seggt: Ünner de Ministerpräsidenten Wulff un McAllister hebbt se den Landdag in Hannover tweemal verkehrt Utkunft geven un för en Narren hollen. De Lannsregerung harr to Protokoll geven: Se harrn de Privaat-Veranstaltung "Nord-Süd-Dialog" keen Stütt geven, nich mit Geld un ok nich bi't Dörplanen.

Dat Weer

Un woans süht dat mit dat Weer umto ut? Opstunns hebbt wi in Bremen 2 Graad, in Bremerhaven, Verden un op Wangeroog sünd dat 3 Graad. Vundaag: vun fröh bet laat vele Wulken, un af un an regent dat ok en beten. Gegen Avend ritt de Wulkendeek vun't Emsland her op. Dat Thermometer schafft dat nich över 5 bet 7 Graad. De Wind dorto weiht in Maten bet frisch vun de süüdwesten Kant. Tokamen Nacht: Mal mehr, mal weniger Wulken. Dat blifft dröög, de Wind warrt weniger. Nich unner 5 bet 4 Graad. Morgen: över Dag meisttiets diesig mit vele Wulken, af un an kann dat pladdern. Twüschen 8 un 9 Graad. De Süüdwestenwind briest wedder op, he weiht frisch oder sogoor kräftig. Dat weern de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Nendza.