Plattdeutsche Nachrichten

De Plattdüütschen Nahrichten vun'n 10.September 2012

Plattdüütsch Nahrichten vun'n 10. September 2012, [3:31]

Amtlich Enn vun de Paralympics

London:  Met de 14. Paralympischen Sömmer-Spelen is amtlich Sluß maakt worrn.  Grootbritannien het de behinnerten Sportlers ut 165 Natschonen met een groote Musik-Veranstalten tschüss seggt. Bi de Afslußfier het de quersnittslähmte Dischtennispeler Thomas Schmidberger de düütsche Fahn in dat utverköffte Olympia-Stadion dragen. De düütsche Mannschaft het allns in allen 66 Maal Bronz, Sülver un Gold wunnen un steiht darmet op den achten Platz in den Medaillen-Spegel. Darna het Rio de Janeiro sick denn as Gastgever vun de tokamen Paralympics in't Johr 2016 vörstellt.

Protest vun de Kassen-Dokters in ganz Düütschland

Berlin:  In den Striet met de Krankenkassen üm mehr Geld gaht de Kassen-Dokters vondaag in ganz Düütschland op de Straten. Se wüllt op schriftliche Anfragen vun de Kassen keen Antwoort mehr geven un met de Metarbeiters vun de Kassen blots noch vör Klock 8 s'morgens un na Klock 8 s'avends snacken. Op de Patschenten schall dat eerstmaal nich dörslaan. Met den Protest wüllt de Dokters Drifft achter dat Föddern  na mehr Geld setten. De Kassenärztliche Verenigung föddert 3,5 Milliarden Euro mehr för de Kassen-Dokters. De Krankenkassen harrn tolest 270 Millionen Euro anbaden.

Wat is bi den Flaminia-Insatz bi rutkamen?

Wilhelmshaben:  Een Dag, nadem de havareerte Container-Frachter "Flaminia" na Wilhelmshaben sleept worrn is, ward opstunns ünnersocht, wat bi den Bargens-Insatz bi rutkamen is.  In Wilhelmshaben wüllt de Ministers Birkner un Bode vun Neddersassen un de Baas vun dat Havaree-Kommando, Monsees, wat darto seggen. De Frachter har in'n Julimaand in'n Atlantik Füer fungen un het twee-dusend-acht-hunnert Containers an Boord hat,  darvun 51 met Gefohrgoot.

Perzess vunwegen Füer in Demhorster Wahnhuus

Demhorst: Lichtfardig Füerpüsteree un lichfardig Schaden an't Liev andoon ward twee junge Keerls vörsmeten, de vun vondaag af an vör't Jugendschöffengericht staht.  Dree Minschen sünd verleden Sömmer bi een Brand to Schaden kamen. 25 Wahnungen sünd dör dat Füer tonicht maakt worrn un üm un bi 100 Minschen hebbt keen Dack mehr övern Koop hat. Na dat, wat de Staatsanwaltschop taxeert het, liggt de Schaden an Saken bi dree Millionen Euro.

Füer in Veern

Bendingbostel:  Een Füer het gistern avend in den Oortsdeel vun Kirchlinteln in'n Kreis Veern een Schüün met Maschien vun'n Buernhoff tonicht maakt. Na Menen vun de Polizei liggt de Schaden bi fief-hunnert-dusend Euro. Dree Minschen hebbt dör dat Rookgas wat afkregen.

Dat Weer

Un woans süht dat met dat Weer ümto ut? An de Fischereehaben-Slüüs Bremerhaben un in Deefholt hebbt wi opstunns 17 Grad, an'n Bremer Flooghaben 18 un in Staad 19 Grad. Vondaag is't eerstmaal fründlich, laterhen treckt vun Westen her Wulken ran, aver dat blifft meist dröög, blots af un an kann't maal 'n Schuer geven. Dat Thermometer stiggt op 25 bet 27 Grad, un de Wind weiht swack ut de süd-oosten Kant un dreiht s'avends op West. Tokamen Nacht blifft dröög, un dat Thermometer sackt op 16 Grad. Morrn is't anfangs meist fründlich un noch dröög. Nahmdags treckt denn veel Wulken ran, un dat gifft Regen oder ok Gewitter. Dat Thermometer stiggt op 20 bet 22 Grad, un de Wind weiht anfangs swack, laterhen met Maten bet frisch un dreiht vun Südwest na West. Middeweken wesselt Sünnschien un Wulken, un dat ward nich warmer as 17 Grad. Dat weern de Narichten. Ulrike Müller het se tohoopstellt. Op platt trechtmaakt un vörleest het se Marianne Kozlowski.