Plattdeutsche Nachrichten

De Plattdüütschen Nahrichten vun 'n 10. Februar 2012

Plattdüütsch Nahrichten vun'n 10. Februar 2012, [4:38]

Grekenland schall Bedingen annehmen

Brüssel: De Finanzministers vun 't Euro-Flach gifft de Regeern in Grekenland to 'n lesten Maal Tied. Dat Land kriggt bloots denn noch mehr Geld op Pump, wenn bet Middeweken tokamen Week dree Saken kloor sünd. De Maten vun de Koalitschoon mööt mit ehr egen Hand un Mark toseggen, jo, se wüllt ahn wenn un aversten wiederhen för dull sporen un dat ganze Weeswark reformeren, dat Land mutt för Düvelskneep ruut uut  den groten Slamassel bi sien Hannel un Wannel. In 't Parlament mööt se to all dat ook jo seggen. Un amenn schall de Regeern verklookfideln, wo se sick nochmaal dreehunnertfievuntwintig Millionen Euro an 'n Mund afsporen will. Lüüd vun de Gewerkschop sünd dor partu op tegen, dat jümmer mehr sport warrt. Se wüllt wedder lawayn.         

In 'n Bundsdag beratslagt se över dat Atoomlager Asse

Berlin: In 'n Bundsdag bekakelt se vundagen, wo schall dat wiedergahn mit de Asse, wo Atoomschiet lagert. Uut dat Bargwark, wo se eens Solt vun deep ünnen holen deen, mööt se mehr as eenhunnerttwintigdusend Fatten wedder ruutklein. In düsse Tünnen is Avfall binnen, de radioaktiv strahlt un dat för ganz lange Tieden. Afordnete vun SPD un Gröne sünd verlangen, ruut mit den Schiet, so gau, as dat jichtens geiht. In de Dobben ünner de Eer flütt Dag för Dag wat bi twölfdusend Liter Water rin. Kunn angahn un de Lökker stött eendags in, ganz un gaar oder tominnst deelwies. Wo se dat trechtkregen schüllt mit dat Bargen vun den Atoomschiet, dat weten se noch nich. Kösten warrt dat allens woll 'n paar Milliarden Euro.    

Kind na Meningokokken-Infektschoon storven

Bremen: Bi 'n Krankenhuuskrink Gesundheit Nord hebbt se verkloort, dat Kind, wat in 't Krankenhuus Bremen-Midde dootbleben is, weer keen Lütten, wat veel to fröh op de Welt keem. Nee, dat Kind, annerthalv Johren oolt, weer böös krank vun een Meningokokken-Infektschoon her. Bi Radio Bremen hebbt se in de Künn kregen, de Öllern hebbt ehr Lütts sülben in 't Kankenhuus bröcht, dorhen, wo se Kinner in Noot behannelt, wieldat ehr Kind nich goot toweg weer. Den sien Tostand is batz ganz slecht worrn un denn is dat Lütte miteens storven. Nu smieten de Öllern de Dokters vör, se sünd de slimme Noot vun dat Kind, as dat ankeem, nich glieks wiesworrn. De Staatsanwalt hett nu op den Papierkraam de Hand leggt un Order geven, dat Kind schüllt se opschnieden un ünnersöken.  

Niegen Pries för Literatuur op Platt

Emden: Ditt Johr gifft 't niegen Pries för dat, wat Lüüd op Platt schrifft. Sien Naam hett düsse Pries na den plattdüütschen Dichtersmann Johann Friedrich Dirks kregen, de vun Emden her is. Wat de Lüüd opmaalt, dat kunnen lütte hartgrepen Riemels jüst so as Vertellen sien, de wat grötter sünd. Hörspelen oder Theoterstükken kieken se sick avers ook an. Wenn junge Lüüd mitmaken wüllt, kann 't ook Film sien. Se hebbt sick uutklamüstert, worüm sick de Saak dreihen schall bi ditt eerste Maal. Dat heet so: "Well weet , waar 't gaud för is". De sien Nees amenn vörn hett, kriggt tweedusendfievhunnert Euro op de Hand.   

Schaffermahltied in Bremen

Bremen: In dat Raathuus vun Bremen gifft 't vundagen to '
n veerhunnertachtunsösstigsten Maal de Schaffermahltiet, een Eten mit veel Traditschoon. De Lüüd seggt, is de öllste Saak, bi de sick bloots Mannslüüd drepen un tosamen wat eten. Hüüt sünd dat mehr as dreehunnert, de dor mit bi sünd. Se slöögt sick Höhnersupp, Stockfisch un bruunen Kohl to Liev. Middenmang ehr Spiesen höört sick de Mannsbiller twölfmaal an, wat kloke Lüüd an 't Snacken sünd. Ditt Johr hebbt se Norbert Lammert, Präsident vun 'n Bundsdag, as Ehrengast inladen.     

Dat Weer

Un ditt noch vun 't Weer: In Willemshaben un Braak wiest dat Thermometer opstunns minus veer Grod, bi 'n Fleegerhaben Bremen minus söben un op de Fischereehabenslüs Bremerhaben minus fiev. Vundagen deelwies lachen Sünn, deelwies Wulken. Af un an kann 't ook 'n lütt beten snein. Minus fiev bet minus twee Grod. Tokamen Nacht af un an Wulken, tomeist aver kloren Heben un dröög. Minus söben bet minus twölf Grod. Hier un dor Wittfrost. Morgen mehr Wulken, de Sünn schient bloots noch af un an. Dat lett, gifft 't Sneeschuers. Wat bi minus twee Grod rüm. So wiet Nahrichten op Platt, trechtmaakt vun Ulrike Müller. Plattdüütsch trechtböögt un vörleest hett se Ulf-Thomas Lesle.