Plattdeutsche Nachrichten

De Plattdüütschen Nahrichten vun'n 6. Juni 2012

Plattdüütsch Nahrichten vun'n 6. Juni 2012, [3:28]

Jade-Weser-Port maakt later op

Wilhelmshaben – De Jade-Weser-Port in Wilhelmshaben ward erst in'n September un darmit twee Maand later as dat plaant wesen is, open maaken. Darop hebbt sik de Länner Bremen un Neddersassen an'n Abend bi een Sünnerdreepen eenigt. Darachter stickt de orrig veelen Risse an de Kaje. De Bremer CDU kriteseert in düssen Tosamenhang de Lannesregeern. Se smiet Staatsrat Heseler vun de SPD vör, dat he dat, wat dar vör sik güng, nich richtig beurdeelt hett. Twars is dat Entscheeden över dat Verschuven vun't Openmaken vun den Deepwaterhaben nah de Meen vun de CDU richtig, dat keem aver veel to laat.

EU-Kommischon will bi Redden-Aktschonen Stüertahler entlasten

Brüssel – De EU-Kommischon will bi Redden-Aktschonen för europäische Banken in Tokunft de Stüertahler entlasten. Socke Regeln will dat Amt an'n Middag vörstelln. Darnah schüllt de Banken sülfst as ok de Aktschonäre un Geldgever mehr betahlen. Alle EU-Staaten schüllt Krisenfonds inrichten, de dör natschonale Bankenafgaven betahlt ward.

Russischet Parlament verknappt Recht op Demonstratschon

Moskau – De russische Parlament hett dat Recht op Demonstratschon verknappt. Gegen den Wedderstand vun de Oppositschon hett de Partei "Einiges Russland" hohe Geldstraafen besluten för dat Verstötten gegen dat Versammelnrecht. Minschenrechtler wahrschaut vör een Enn vun de Meningsfreeheit. De Oppositschon kriteseert dat Gesett as Schreed, de een för allemal in den Polizeistaat föhrt. In Russland harr dat in de verleden Maand jümmer wedder Massenproteste gegen de Boversten üm Präsident Putin geven. Bi een Demonstratschon gegen dat neje Gesett hett de Polizei güstern alleen in Moskau 50 Minschen fastnahmen.

Oberverwaltengericht hett to doon mit Striet üm Grünnen vun een freje School

Bremen – Dat Oberverwaltengericht hett hüüt Vörmiddag to doon mit den Striet üm dat Grünnen vun een freje School in Bremen. Een Grupp vun Öllern liggt all siet bold 5 Jahren mit dat Billenressort in Striet över de Verlöövnis för een private Grundschool. De freje School much gern een Lernoort för Kinner vun dree bit twölf Jahren sien; Kinnergoorn un Grundschool ünner een Dack för tohoopnahmen 45 Kinner. Dat besünnere: jedet Kind schall sülfst entscheeden, wann sik dat mit wecket Fack befaaten will. Nah Angaven vun den Vereen is Bremen dat eenzig Bunnesland, in dat dat bitnu keen Alternativ-School gifft.

Passageere köönt wedder to faste Tieden vun Bremen ut nah Danzig fleegen

Bremen – Vun hüüt Middag an köönt Passageere wedder vun Bremen nah Danzig fleegen. Vun nu an fleegt de polnische EuroLOT de Streek. Dat is de drütte Versöök, Flöög to fasten Tieden nah Danzig intoföhren. Vördem hebbt Ryanair un dat Bremer Ãœnnernehmen OLT Express düsse Streek vun'n Plaan nahmen, wieldat nich noog Lüüd se nutzt hebbt.

Dat Weer

Un nu een Blick op dat Weer: in Achim un an den Bremer Fleegerhaben 11, an de Fischereehabenslüüs in Bremerhaben un in Bremervöör sünd dat opstunns 12 Grad. Hüüt is dat de mehrste Tied dick wulkig, all an'n Vörmiddag fangt dat vun Westen her an to regnen. Ok an'n Nahmiddag kann dat natt weern, meist lockert dat bi 13 bit 15 Grad nich op. Tokamen Nacht ward wesselnd wulkig un nah Middernacht regent dat af un an een beten. Dat Thermometer sackt op 10 Grad. Morrn wesselnd bit dull wulkig, darto Schuers un mit 19 bit 20 Grad een beten warmer. An'n Freedag mal Sünn, mal dicke Wulken, ok Grummelschuers sünd mögelk bi 20 bit 22 Grad. Dat weern de Nahrichten op platt. Kathrin Martens hett se tohoopstellt. Op platt trechtmaakt un vörleest hett se Heidi Jürgens.