Plattdeutsche Nachrichten

De Plattdüütschen Nahrichten vun'n 30. April 2013

Plattdüütsch Nahrichten vun'n 30. April, [3:51]

Tall vun Lüüd ahn Arbeit na ünnen gahn

Nörnbarg. De Tall vun Lüüd ahn Arbeit is in den April op 3.020.000 na ünnen gahn. Dat weern 57.000 mehr as vör een Johr, vermell de Bunnsagentur för Arbeit jüst in Nörnbarg. De Quoot vun Lüüd ahn Arbeit güng op 7,1 Perzent torüch. In Neddersassen hebbt in den April üm un bi 270.000 Minschen en Job söcht. De Quoot is op 6,7 Perzent runnergahn. In Bremen hett sik de Tall vun de Arbeitslosen meist nich ännert. De Quoot liggt wieder bi 11,6 Perzent.

Stadt will Universum woll övernehmen

Bremen. As dat lett, schall dat wiedergahn mit dat Universum Science Center un de Utstellung schall vun de Schulden freestellt warrn. De Werser-Kurier mellt, de Stadt will den Bedrief övernehmen un ornlich Geld rinstecken. Se hebbt rutfunnen, dat dat Wirtschaftsressort ünner Senater Günther vun de SPD en Plaan dorför utarbeiten deit. De Wetenschafts-Utstellung schall nee un frisch maakt warrn, dat wedder mehr Lüüd anlockt warrt. Denn will de Stadt de Schulden, de bi 1 Million Euro liggt, övernehmen. För't Eerste warrt de Stadt den Bedrief dorto noch mit een halve Million Euro in't Johr Stütt geven.

Personalversammlung an Bremer Scholen

Bremen. An vele Scholen in de Stadt is vundaag de Ünnericht vun Klock 10 af an utfullen. De Lehrers sünd to en Personalversammlung tohoop kamen. Se wüllt wieder gegen de Bremer Bildungspolitik protesteren un dat schall nu plaant warrn. Vele Lehrers sünd in de Brass, dat jümehr Lohn in de tokamen twee Johr nich hooch sett warrt. Na dat Verhanneln över de Tarife schöölt de Anstellen mehr Geld kriegen, man de Senat harr fastleggt: för de meisten Beamten warrt dat nich so maakt. Denn glöövt vele Lehrers nich, dat dat langt mit de Lehrersteden, de dat vun den Senat bavento gifft.

NSU-Perzess: Lott-Verfohren warrt bekrittelt

München. Bi dat Utlosen vun de 50 Plätz för de Press bi den NSU-Perzess hebbt grote överregionale Zeitungen dat nich rinschafft. Nu wüllt en poor Medienhüüs ruutkriegen, wat dat rechtens weer. Ok Journalisten-Verbänn sünd heel un deel nich inverstahn. Man de Präsident vun dat Oberlannsgericht, Huber, sä, dat Verfohren is recht. De "Frankfurter Allgemeine Zeitung", de "Zeit", de "taz" un de "Süüddüütsche Zeitung" hebbt keen Plätz afkregen. Dat Bunnsverfatensgericht harr beslaten, dat de Plätz nee verdeelt warrn mööt. De Richters harrn uttosetten, dat bi't  eerste Maal keen törksche Journalisten rinkamen weern.

Nedderlannen: Königin Beatrix dankt af

Amsterdam. De Nedderlannen kriegt vundaag en nee'e Staatsböverste. Na 33 Johr hett Königin Beatrix nu jüst afdankt. Ehr öllste Söhn Willem-Alexander folgt ehr op den Throon. An den Namiddag warrt he mit en Fest vör de Lüüd vun't Parlament un Gäst in sien nee'e Amt inföhrt. In de Nedderlannen in dat nich begäng, dat de Kroon opsett warrt. Wenn de nee'e König den Eed afleggt, warrt Vertreders vun 18 anner Föörstenhüüs dorbi ween.

Dat Weer

Un woans süht dat ut mit dat Weer umto? Opstunns hebbt wi in Bremerhaben un Ollnborg 8 Graad, in Bremen un Deefholt 10 Graad. Vundaag schient de Sünn, denn un wenn en poor Wulken. Dat blifft dröög un an den Namiddag  kladdert dat Thermometer op 12 bet 15 Graad. De Wind dorto dreiht op Noordwest un blaast an den Namiddag en beten mehr mit 4 bet 5. Tokamen Nacht kloor un dröög. Hier un dor Daak. Dat köhlt af op 3 bet 0 Graad. Wohrschau: Dat kann Frost an den Grund geven. An den 1. Mai lacht de Sünn un dat blifft dröög bi 16 Graad. Dünnersdag immer mal wedder Wulken, meisttiets dröög. In de tokamen Daag kann dat immer wedder Schuer geven bi 14 bet 16 Graad. Dat weern de Narichten. Op Platt trechtmaakt un vörleest vun Christiane Ehlers. Tohoopstellt hett jüm Ulrike Müller.