Plattdeutsche Nachrichten

De Plattdüütschen Nahrichten vun'n 02. Mai 2013

Bayern kummt in't Champions-League-Endspeel

Barcelona - To'n ersten Mal in de Geschicht speelt in't Endspeel vun de Football-Champions-League twee dütsche Mannschuppen gegeneenanner. Nah Borussia Dortmund is ok Bayern München in't Finale kamen. De Mannschupp vun Trainer Jupp Heynckes hett güstern Abend dat Halffinal-Rückspeel gegen den FC Barcelona mit 3 to 0 wunnen. Dat Henspeel hebbt se all mit 4 to 0 för sik klaar maakt. An'n Dag vördem harr sik Dortmund gegen Real Madrid dörsett.

Proteste in Bremerhaben

Bremerhaben – Schöler, Öllern un Schoolmesters gaht opstunns in Bremerhaben gegen den Utfall vun Ãœnnerricht op de Straat. De Gewarkschupp Kinner-Groottrecken un Wetenschupp GEW rekent mit 5-dusend Lüüd, de mitmaakt. As de Gewarkschupp dörrekent hett, bruukt de Scholen vun Bremerhaben 170 tosättliche Schoolmester-Stäen, darmit se de Schoolreform stemmen köönt un alle Schöler de glieken Schangsen bi de Bilden hebbt. De Protestgrupp treckt vun'n Hauptbahnhoff un vun'n Leher Markt ut nah de Binnenstadt. De Polizei rekent darmit, dat dat bit to'n Middag mit'n Verkehr eng weern kunn.

Metaller striekt för mehr Geld

Bremen – In'n Tarifstriet vun de Metall- un Elektroindustrie hett de IG-Metall in de Nacht mit ehr Strieks to'n Wahrschaun wieter maakt. So gaht hüüt ünner annern de Arbeiters bi Lear Corporation in Bremen un vun de Nee'e Jade-Warft in Wilhelmshaben op de Straat. Morrn schall dat denn Laways bi Mercedes un Airbus in Bremen as ok bi Premium Aerotec in Varel geven.

Land verköfft Warft-Andeele

Bremerhaben – De Wertschuppsdeputatschon schall hüüt besluten, dat de Lannesandeel an de Bremerhabener Lloyd Warft verköfft ward. Dat Land will sien Andeel in Höögde vun rund 13 Perzent för 4,8 Millionen Euro an de BLG Logistics Group överdrägen. Mit dat Geld wüllt se den Utboo vun een Dock mit betahlen. Noch nich klaar is, wat de tokünftige Rull vun den nee'en Mit-Eegner BLG sien ward. De Kunzern sülfst will darto bitnu nix seggen.

LKW leggt A 28 lahm

Ollenborg – Een acht Kilometer lange Spoor vun Diesel hett in de Nacht för een Vull-Dichtmaken vun de Autobahn 28 twüschen den Stäen Bad Twüschenahn-West un Nee'enkruge soorgt. De Tank vull mit 800 Liter Diesel vun een nedderlännschen Saddeltog weer nah Angaven vun de Polizei in een Boostäe opreten worrn un harr de Streek mit een smeerig Film övertrocken. De Autobahn weer för een paar Stunnen afsperrt.

Dat Weer

Un nu een Blick op dat Weer: an den Bremer Flegerhaben, in Bremervöör un in Ollenborg 10 un an de Fischereehabenslüüs in Bremerhaben sünd dat opstunns 9 Graad. Hüüt is dat meist duller wulkig aver dröög, an de Küst schient bi blots een paar Wulken meisttieds de Sünn bi 15 bit 18 Graad. Tokamen Nacht ward dat meist licht wulkig un dröög – dat Thermometer sackt op 8 bit 5 Graad. Freedag Sünn un Wulken in'n Wessel bi 17 Graad. An'n Sünnabend treckt een beten Regen dör, darbi ward dat köhler bi 15 Graad. Dat weern de Nahrichten op platt. Stephanie Giese hett se tohoopstellt. Op platt trechtmaakt un vörleest hett se Heidi Jürgens.