Plattdeutsche Nachrichten

De Plattdüütschen Nahrichten vun'n 03. Mai 2013

Plattdüütsch Nahrichten vun'n 3. Mai 2013, [3:05]

Gewarkschupp sett mehr Strieks in Gang

Bremen – De IG-Metall sett mehr Strieks to'n Wahrschaun in Gang. Hüüt löppt veel in Bremen un in'n Nordwesten vun Neddersassen. An'n Morrn hebbt vör dat Daimler-Wark in Bremen Sebaldsbrügg rund 3-dusend Arbeiters för 5,5 Perzent mehr Geld demonstreert. De Arbeitgever wüllt 2,3 Perzent mehr geven. De Laway harr bi Daimler in Nachtschicht anfungen un schall den heelen Dag wieter gahn. Gegen Middag gifft dat Proteste bi Airbus un EADS un anner Metallbedreeve in Bremen, Bremerhaben un Achim. In't nordwestliche Neddersassen striekt se ünner annern in Varel un Noornham.

Stamm will de Naams vermellen

München – De bayrische Landtagspräsidentin Stamm will de Naams in de so nöömte Verwandten-Affär vermellen. Stamm will seggen, wecke Afordneten nah dat Johr 2000 Ehepartner or Kinner op Staatskosten as Mitarbeiters anstellt hebbt. Bit morrn Middag will se mit allen Politikers, de dat bedraapt, snacken. Achternah will Stamm de Naams vermellen - as de Bayrische Rundfunk weet, sünd all Parteien darbi, mit Utnahm vun de FDP.

Anslääg in Boston weern för den Unafhängigkeitsdag plaant

Washington – De Bombenanslääg vun Boston weern egens för den US-Natschonalfeierdag an'n 4. Juli plaant. Dat vermellt de Fernsehsender NBC un weet dat, wieldat dat de Mann seggt hett, vun den se vermoden sünd, dat he darachter stickt: Zarnajew. Wiel de Bombs fröher as plaant fardig worrn sünd, hebbt se sik darto entscheeden, den Anslag all in'n April to maken.

Senatorin reageert op Demo

Bremen – Bremerhaben un Bremen versöökt gemeensam seker to stellen, dat dat noog goden Ãœnnericht för alle gifft – dat vermellt Billensenatorsche Quante-Brandt. Wi snackt mit allen, de dat angeiht, so de Senatorsche. Buterdem wiest de darop hen, dat de Senat 7,5 Millionen Euro mehr för de Billen besluten hett. Quante-Brandt antert darmit op de Demonstratschon vun Schölern, Öllern un Schoolmesters güstern in Bremerhaben. Dat heet, dar weern rund 6-dusend Minschen mit darbi. Se güngen för mehr Geld för de Billen un gegen den Utfall vun Ãœnnericht op de Straat.

Achim will sien Footgängerzoon överdacken

Achim – De Raat vun de Stadt hett an'n Abend den Weg freemaakt för een Projekt, över dat se nich all een Meen sünd: se wüllt över de heel Footgängerzoon een Dack boon. Mit een grode Mehrheit hett de Raat vun Achim besluten, dat de Stadtbibliothek in't Raathuus ümtrecken schall. Dat is de Grundlaag för dat Dack. De Raat hett darmit sien egen Urdeel vun't verleden Jahr ümsmeten.

Dat Weer

Un nu een Blick op dat Weer: an den Bremer Flegerhaben un in Demhörst 11, an de Fischereehabenslüüs in Bremerhaben un in Ossenbrügg sünd dat opstunns 12 Graad. Hüüt is dat wesselnd wulkig, af un an schient de Sünn un dat blifft meist dröög – bi 15 bit 17 Graad. Tokamen Nacht ward dat meist licht wulkig or klaar, dat Thermometer sackt op 9 bit 7 Graad. Morrn mal so, mal so un een paar Schuers, darbi een beten köhler bi 12 bit 15 Graad. Sünndag Sünn un Wulken in'n Wessel, üm 18 Graad. Dat weern de Nahrichten op platt. Karsten Ohl hett se tohoopstellt. Op platt trechtmaakt un vörleest hett se Heidi Jürgens.