Plattdeutsche Nachrichten

De Plattdüütschen Nahrichten vun'n 06. Mai 2013

Plattdüütsch Nahrichten vun'n 6. Mai 2013, [2:37]

NSU-Perzess fangt an

München – In de Stadt fangt an'n Vörmiddag de Perzess gegen de Littmaten vun de rechte Terror-Grupp NSU an, op den se all so lang töövt. Hauptanklagte is de vermoden Neonazi-Terroristin Beate Zschäpe. Se schall mit twee Annern, de middewiel dod sünd, tohoopnahmen 11 Minschen ümbröcht hebben. Vör Gericht staht ok veer Mannslüüd, de de NSU woll holpen hebbt.

In Syrien is woll Giftgas insett worrn

Damaskus – In Syrien gifft dat mehr un mehr Henwiese, dat in'n Börgerkrieg Giftgas insett worrn is. De Vereenten Natschonen sünd vermoden, dat de Rebellen dat Gas Sarin bruukt hebbt. Dat tominnst hebbt versehrte Lüüd, Doktors un Mitarbeiters vun Krankenhüüs de UN vermellt, so een Sprekersche in't Schweizer Fernsehen.

Politikers sorgt sik üm Afghanistan-Suldaten

Berlin – Nah den Dod vun een dütschen Elite-Suldaten in Afghanistan hebbt Politikers vun Koalitschon un Oppositschon seggt, dat se sik över de Sekerheit vun de Trupps sorgt. De Grönen-Politiker Nouripour rekent darmit, dat Bunneswehrsuldaten bit to'n Aftrecken ut Afghanistan in't tokamen Johr jümmer mehr ünner Gefahr staht. CDU-Generalsekretär Gröhe wahrschaute darvör, an'n Afghanistan-Insatt wat to verännern.

IG-Metall striekt wieter

Papenborg –De IG-Metall maakt wieter mit ehr Strieks to'n Wahrschaun in'n Nordwesten. An'n Vörmiddag schüllt de Arbeiters vun de Lear Corporation in Bersenbrügg un vun de Ossenbrügger Maschiensfabrik Herzog de Arbeit för een Tied daal leggen. Ok an de Papenborger Meyer Warft ward hüüt lawayt. De IG-Metall foddert 5,5 Perzent mehr Geld. De Arbeitgever wüllt bitnu 2,3 Perzent geven.

Football an'n Sünndag

Hamborg – In de Football-Bunnesliga hett de Hamborger SV güstern Abend gegen Wolfsborg tohuus 1 to 1 speelt. De Hamborger hebbt darmit de Schangse verpasst, näher an een Europa-League-Platz rantokamen. Freiburg hett gegen Augsburg, dat gegen dat Afstiegen speelt, mit 2 to 0 wunnen.

Dat Weer

Un nu een Blick op dat Weer: in Cuxhaben 13, an den Bremer Flegerhaben 16, an de Fischereehabenslüüs in Bremerhaben 17 un in Ossenbrügg sünd dat opstunns 18 Graad. Hüüt schient faken de Sünn, an'n Nahmiddag treckt man jümmer mehr Wulken op un dat kann Schuers geven bi 23 Graad. Tokamen Nacht sackt dat Thermometer op 9 Graad. Morrn blifft dat Weer so as dat hüüt is, Middeweken wesselt sik Sünn un Wulken af, dat kann Schuers geven, bi 22 Graad. Dat weern de Nahrichten op platt. Ralph Stölting hett se tohoopstellt. Op Platt trechtmaakt un vörleest hett se Heidi Jürgens.