Plattdeutsche Nachrichten

De Plattdüütschen Nahrichten vun'n 7. Mai 2013

Plattdüütsch Nahrichten vun'n 7. Mai 2013, [3:24]

Islaamkonferenz kummt in Berlin tohoop

Berlin. Bunnsbinnenminister Friedrich kummt an den Vörmiddag mit Vertreders vun muslimsche Organisatschonen tohoop. Dat geit vör allen dorüm, dat Muslimen faken nich goot behannelt warrt, üm Antisemitismus un üm Islamismus. Al vör dat Drapen hebbt velen keen gode Wöör för de Konferenz funnen. En Reeg muslimische Verbänn leggt Friedrich to Last, dat he dat Thema Terrorismus to dull in den Mittelpunkt stellen worr. De Binnenminister vun Nordrhein-Westfalen, Schneider, süht dat jüst so. Bi de Konferenz schall dat üm Fragen vun de binnere Sekerheit gahn, sä he.

Steinbrück bekrittelt Opsichtsraat vun Bayern

Düsseldörp. SPD-Kanzlerkandidat Steinbrück hett den Opsichtsraat vun Bayern München bekrittelt. He versteiht nich, dat de Liddmaten bi Uli Hoeneß as Bayern Baas biblieven doot. Bi en Podiumsdiskusschoon in Düsseldörp sä Steinbrück: De Ünnernehmen, de in den Opsichtsraat sünd, so as Audi un Adidas, hebbt jümehr egen Regeln, wat richtig un wat verkehrt is. Düsse Regeln schullen ok för dat Football-Ünnernehmen Bayern München gellen. De Bayern Opsichtsrööt harrn sik güstern achter Hoeneß stellt, ok wenn dat jüst den Schandaal mit sien Stüern geven hett.

Italien verlangt: nu mutt gau wat daan warrn, nich mehr so vele junge Lüüd keen Job hebbt

Madrid. De nee'e Baas vun de italiensche Regerung hett vun de EU verlangt, dat Problem antogahn, dat to vele junge Lüüd keen Job hebbt. Na en Drapen mit sien spaanschen Kollegen Rajoy in Madrid sä Letta: een dörv nich de Ogen tomaken, wenn jede drüdde, oder gor jede twete junge Minsch keen Arbeit hett. De beiden Böversten vun de Regerungen meent: En Bankenunion kunn de wirtschaftliche Laag vun de Krisenlänner beter maken.

SPD-Afordnete kriggt keen Arger mit de Justiz  

Bremen. De Afordnete ut de Börgerschaft Martin Koroll kriggt keen Arger mit de Justiz, ok wenn he över Roma un Froons Saken seggt hett, mit de vele nich inverstahn sünd. Radio Bremen hett rutkregen, dat de Staatsanwaltschaft keen Verfohren wegen Volksverhetzung in Gang setten warrt. De SPD-Frakschoon harr Koroll vör de Döör sett, he harr in't Internet Saken schreven, de diskriminerend un rassistisch sünd.

Bremer Senat stellt Bericht över Rechtsextremismus vör

Bremen. Binnensenater Mäurer leggt vundaag sien Bericht över Rechtsextremismus un Fremdenfeindlichkeit op'n Disch. Dat geiht dorüm, woans dat mit düsse Problemen in de verleden fief Johr lopen is. Denn will Mäurer verkloren, wat de Senat gegen de rechte Szeen doon will. De DPA vermellt: dat geev weniger Verbreken, wo een Gewalt bruukt hett.

Dat Weer

Un woans süht dat ut mit dat Weer umto? Opstunns hebbt wi in Bremerhaben 16 Graad, in Bremen, Deefholt un Staa 17 Graad. Vundaag schient eerst noch de Sünn. Man na un na treckt vun Süüdwesten mehr Wulken op. An den Namiddag kann dat Schuer geven, mag ween ok mit Blitz un Dunnerslag. Dat Thermometer kladdert op 20 bet 23 Graad. De Wind dorto weiht flau bet in Maten vun de oosten Kant. Tokamen Nacht: vele Wulken, dat kann immer wedder pladdern bi 13 Graad. Middweken: Mal Sünnschien, mal düüstere Wulken. Immer wedder Schuer bi 20 bet 22 Graad. In de tokamen Daag warrt dat wat köhliger, blots noch 15 bet 17 Graad. Sünn un Wulken wesselt sik wieder af, twischendör gifft dat wat af un an wat Nattes vun baven. Dat weern de Narichten. Op Platt trechtmaakt un vörleest vun Christiane Ehlers. Tohoopstellt hett jüm Gerrit Busch.