Plattdeutsche Nachrichten

De Plattdüütschen Nahrichten vun'n 8. Mai 2013

Plattdüütsch Nahrichten vun'n 8. Mai 2013, [3:43]

Panzers na Indonesien: Regerung seggt Ja

Berlin: Seggt warrt: De Regerung hett tostimmt, dat düütsche Kampfpanzers na Indonesien verköfft warrn köönt. "Spiegel online" mellt: De Grönen harrn nafraagt, un de Bunnsregerung hett jüm dat to weten geven. Dor heet dat: De Firma Rheinmetall hett vun den Bunnssekerheitsraat Verlööf kregen, dat se 104 Kampfpanzers Leopard 2 un noch 7 anner Panzers na Indonesien verköpen dröfft. Gröne, Linke un Minschenrechtlers sünd bang: De indoneesche Regerung kunn de Panzers insetten in den Striet mit de Minderheiten dor.

Mehr un mehr mööt mit Hartz-IV opstocken

Berlin: Mehr un mehr Minschen in Düütschland köönt nich vun jümehr Arbeit leven. Ok wenn se vull oder halfkraft arbeiten doot, bruukt se noch Hartz-Veer bavento. So steiht dat in de Süüddüütsche Zeitung, un de hebbt de Tallen vun de Bunnsagentur för Arbeit. Dor heet dat: In de verleden veer Johr müssen pö a pö mehr Lüüd opstocken. De SPD verlangt dorum: För ganz Düütschland schull en Minnstlohn gellen vun 8 Euro 50.

Bunnswehr mit weniger Steden

Berlin: Dat se bi de Bunnswehr mit weniger Lüüd utkaamt, dor sünd se goot mit op'n Weg. Dat weet dat Hannelsblatt, un de hebbt dat ut den eersten Twüschenbericht vun Verteidigungsminister de Maizière to den Stand vun de Bunnswehrreform. Opstunns hett de Bund noch um un bi 190.000 Suldaten, 11.000 dorvun hebbt sik freewillig mellt. An't Enn schöllt nich mehr as 185.000 Suldaten bi de Bunnswehr denen. Eenmal mööt se mit weniger Lüüd utkamen, man bavento stellt se de Bunnswehr ok noch nee op. Dat gellt för 80 Perzent vun de Truppen.

Warnstreik bi Bremer Kafferöster

Bremen: De Mitarbeiders in de Kaffeproduktschoon bi Mondelies in Bremen hebbt vunmorgen twee Stünnen lang jümehr Arbeit liggen laten. De Gewarkschopp Eten-Drinken-Gasthüüs seggt: Bi den Warnstreik hebbt 140 Lüüd mitmaakt. Vun Klock acht op an löppt de Bedriev dor wedder. De Gewarkschopp wull Druck maken. Se verlangt nich weniger as 3 en half Perzent mehr Geld. Mitte Mai verhannelt se wieder över de Tarifen. Is noch nich lang her, dor hett Mondelies Kraft Foods heten.

Na Frachter-Haveree: Containers swemmt op de Werser

Bremerhaven: Op de Butenwerser weern güstern twee Containerscheep havereert. An'n Vörmiddag wüllt se Containers, de över Boord gahn weern, wedder ut dat Fohrwater ruutfischen. Dat Havereekommando in Cuxhaven seggt: Dat sünd 15 Stahlkisten, de dor in't Water swümmt. Noch is nich kloor, wat de een oder anner villicht afdreven worrn is. Bit laat an'n Avend weer de Werser dicht. Middewiel dröfft Scheep mit nich mehr Deepgang as negen Meter föftig wedder fohren. De beiden Frachter "Maersk Kalmar" un "Conmar Avenue" hebbt se na Bremerhaven sleept. Dor warrt se nakeken.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Emm un Ossenbrügge överall 16 Graad. Vundaag: Mal Sünnschien, mal dicke Wulken. An'n Namiddag köönt vun Westen ok Schuer rantrecken. Dat Thermometer krabbelt op 20 bet 22 Graad. De Wind dorto weiht in Maten vun de süden Kant, an'n Namiddag dreiht he op Süüdwest. Tokamen Nacht: Vele Wulken. Un en Tietlang warrt dat woll ok pladdern. Steerns bekieken – dor warrt nix vun. Nich weniger as 13 Graad. Ok de Dunnersdag fangt mit Regen an. An'n Namiddag kickt de Sünn denn aver doch mal dör de Wulken dör. Un dat bi 15 bet 18 Graad. Dat weern de Narichten. Op Platt trechtmaakt un vörleest vun Reinhard Goltz. Tohoopstellt hett jüm Karsten Ohl.