Plattdeutsche Nachrichten

De Plattdüütschen Nahrichten vun'n 10. Mai 2013

Plattdüütsch Nahrichten vun'n 10. Mai 2013, [3:04]

Merkel besöcht düütsche Truppen in Afghanistan

Kundus: Bunnskanzlersch Merkel is unversehns na Afghanistan flagen, üm düütsche Suldaten dichtbi Kundus to besöken. Fröh an´n Morgen is Merkels Fleger in Masar-i-Scharif ankamen. Ok de Minister för´t Verdeffenderen, de Maizière, is mit dorbi. Se besöökt de Bunnswehr nadem en vun de düütschen Suldaten vör knapp en Week bi en Anslag to Dode kamen is. So as dat plaant is, will de Bunnsregerung vun 2015 an üm un bi 800 Suldaten in´t Land trüchlaten. Se schüllt na dat Enn vun den NATO-Insatz de Suldaten in Afghanistan utbillen.

Parteidag vun de Piraten will Programm fastleggen

Neemarkt in de Oberpfalz: In Bayern geiht dat vundaag los mit de Piraten-Parteidag. Se wüllt en poor Lüüd uttuuschen. So will ünner annern de Geschäftsföhrer Ponader sien Amt daalleggen. 1.500 Lüüd wüllt bet Sünndag op dat Drapen över dat Programm för de Bunnsdagswahl snacken. Opstunns kaamt de Piraten nich so goot an. Mag ween, se schafft dat nich, in´n Bunnsdag rintokamen. 

Debatt üm Dodesstraaf för Kidnapper vun Cleveland

Cleveland: Een Mann in de USA warrt vörsmeten, he harr teihn Johr lang dree Froenslüüd in sien Hand. Nu geiht dat för em üm de Fraag vun de Dodesstraaf. He is ok anklagt vunwegen Moord mit Afsicht, denn he schall een vun de Froenslüüd dwungen hebben, een Kind wegmaken to laten. Bet nu geiht dat in de Anklaag üm de Fraag vun sexuell Gewalt un dat he de Froens wegsleppt hett.

Vele an´t Lief to Schaden kamen na Blitz in Meckelnbörg-Vörpommern

Rostock: Op en Festplatz in Meckelnbörg-Vörpommern sünd  güstern 39 Minschen to Schaden kamen, nadem dor en Blitz inslaan weer. Dat geiht avers nich üm Leven un Dood. Den Blitz harr Knööv, dorüm sünd vele Minschen op´n Grund smeten worrn.

Keen Grootakschoon vun de Polizei

Bremen. An´n Himmelfohrtsdag weern güstern in´n Noordwesten kene groten Akschonen vun de Polizei nödig. In Ollnborg hett dat avers de een oder annere Haueree geven. In Bremen is een, as he nöömt warrt, Stratenbahn-Surfer an´t Lief to Schaden kamen. He harr sik mit sien Skateboard an de Stratenbahn 6 anhangt un is denn mit sien Kopp op de Straat knallt. Frünnen vun em hebbt allens mit en Knipskasten opnahmen.

Dat Weer

Nu kaamt wi to dat Weer: Opstunns hebbt wi an´n Flegerhaven in Bremen föffteihn und in Bremerhaven dörteihn Graad. In Emm sünd dat twölf un in Ossenbrüch veerteihn Graad. Vundaag wesseln sik Sünn un en poor dicke Wulken af. Mag ween un dat gifft ok Schuers. Meisttiets is dat avers dröög. Dat Thermometer krabbelt op sössteihn oder söventeihn Graad. De Wind weiht flau, an de Küst to´n Deel ok frisch vun de süüdwesten Kant. Morgen gifft dat wedder Schuers bi sössteihn Graad, an´n Sünndag blots noch dörteihn Graad. Dat weern de Narichten op Patt, trechtmaakt un vörleest von Holger Zantopp, tohoopstellt hett jüm Ralph Stölting.