Plattdeutsche Nachrichten

De Plattdüütschen Nahrichten vun'n 13. Mai 2013

Plattdüütsch Nahrichten vun'n 13. Mai 2013, [3:58]

Scheten an'n Mudderdag

New Orleans: Bi den Mudderdags-Opmarsch in't amerikaansche New Orleans sünd 19 Minschen verletzt worrn, dorbi sünd ok twee Kinner. De Polizei söcht na dree Lüüd, vun de se meent, dat de dat maakt hebbt. Dat lett, as harrn de ut verscheden Richtungen schaten. De Polizei sä: Bi vele harrn de Kugeln blots de Huut anritzt. De meisten Verletzungen sünd nich so leeg. De US-Bunnspolizei meen, dat weer "Stratengewalt", mit Terror harr dat nix to doon. Bi den Opmarsch harrn 300 bet 400 Lüüd mitmaakt.

Europäischen Plaan gegen jungen Lüüd ahn Arbeit

Paris: Düütschland un Frankriek wüllt tohopen wat dorgegen ünnernehmen, dat in Europa so vele junge Lüüd keen Arbeit hebbt. So steiht dat in de "Rheinische Post". Bunnsarbeitsministersch von der Leyen un ehr franzööschen Kolleeg Michel Sapin wüllt dat in twee Weken in Gang setten. In Grekenland un Spanien hett jeder twete ünner 25 keen Arbeit. Ok in Portugal, Italien un Frankriek seht de Tallen böös leeg ut. De Europäisch Investitschoonsbank schall Milliarden an so'n Unnernehmen utgeven, de Arbeits- un Utbildungssteden extra för junge Lüüd inrichten doot.

Krawall in Bulgarien

Sofia: Na de Parlamentswahl in Bulgarien hebbt sik de Polizei un Demonstranten in de Plünnen kregen. Gegners vun de konservative GERB-Partei hebbt in de Hauptstadt Sofia mit Buddeln un Steen smeten. Na de Stimmen, de se bet nu uttellt hebbt, hett de Partei vun den fröhern Ministerpräsident Borrisow knapp de Nääs vörn. Borrisow weer in'n Februar ut sien Amt gahn, blots wenige Maand, ehrdat sien normale Amtstiet to Enn weer. Vörher weern de Stroompriesen böös anstegen un dat harr överall veel Protest geven. Sien Spoorkurs harr de Staatskass holpen, man de Wirtschaft in dat armste Land vun in de Europäisch Union weer in de Knee gahn.

Füer in Laden in Cuxhaven

Cuxhaven: Groten Schaden hett verleden Nacht en Füer in en Tüüchladen in Cuxhaven anricht. Woso dat Reetdackhuus dicht bi de Strandpromenaad brennt hett, is noch nich ruut. Menschen sünd nich verletzt worrn. De Füerwehr hett dat nich schafft, de Flammen ganz uttokriegen. So mussen se dat Huus unner Kuntroll daalbrennen laten. De Lüüd, de dor wahnt, mussen Finster un Dören dicht holen. De Polizei taxeert den Schaden op nich weniger as 200.000 Euro.

Mehr un mehr Kinner vun Towannerers bruukt Hölp bi de Spraak

Berlin: Bi meist jedes twete Kind vun Towannerers langt dat Düütsch nich för de School. In de Familien snackt se meist goor keen Düütsch. Dat hebbt Bund un Länner unnersöcht, un so steiht dat in de Bild-Zeitung. De Bunns-Beopdragte för Integratschoon, Maria Böhmer, sä: De düütsche Spraak weer de Grundlaag dorför, dat de Minschen in Düütschland ankaamt un en Schangs kriegt, in de Gesellschaft na baven to kamen. "De keen Düütsch kann, is blots Tokieker in uns Land", meen Böhmer. Dorum is dat wichtig, dat Kinner vun Towannerers bi de Spraak Hölp kriegt. Un dat vun Anfang an.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Willshusen 9 Graad, in Cuxhaven sünd dat 10 Graad. Vundaag: Meisttiets dicke Wulken. De Sünn waagt sik blots ganz kort mal ruut. Un denn treckt de een oder anner Schuer dör. Dat blifft koolt mit nich mehr as 13 Graad. De Wind dorto weiht in Maten vun de süüdwesten Kant, an'n Avend warrt he weniger. Wo dat pladdern deit, blaast kräftige Böen. Tokamen Nacht: Ok wedder vele Wulken un Schuer. Nich unner 7 Graad. Mittweken: Eerst hell un fründlich, man pladdern un gewiddern kann dat ok wedder. Warme 22 Graad. Dunnersdag un Freedag: Mal Sunnschien, mal Wulken. An'n Namiddag Schuer ok mit Blitz un Dunnerslag. Un wedder 22 bet 24 Graad. Dat weern de Narichten. Op Platt trechtmaakt un vörleest vun Reinhard Goltz. Tohoopstellt hett jüm Stephanie Giese.