Plattdeutsche Nachrichten

De Plattdüütschen Nahrichten vun'n 14. Mai 2013

Plattdüütsch Nahrichten vun'n 14. Mai 2013, [3:37]

Wedder Warnstreiks in de Metallindustrie

Hannober / Bremen. De IG Metall hett för den Vörmiddag to nee'e Warnstreiks in den Noorden opropen. Dat gellt ok för de Metall- un Elektroindustrie in Neddersassen un Bremen. Dor schöölt de Lüüd in de Warken vun Mercedes un Airbus un de Lüssen-Warft jümehr Arbeit liggen laten. Dat sünd wedder enige vun de gröttsten regionalen Arbeitgevers. Ok na de drütte Runn bi't Uthanneln vun de Tarifen is keen Enn aftosehn för de 140.000 Lüüd, de in de Wirtschaftsfeller Metall  un Elektro in Noorddüütschland arbeiten doot. De Gewarkschopp verlangt 5,5 Perzent mehr Geld. De Arbeitgevers beed bet nu 2,3 Perzent an.

NSU-Perzess geiht wieder

München. Vör dat Oberlannsgericht vun de bayrische Lannshauptstadt geiht dat vundaag wieder mit den Perzess üm de Verbreken vun de rechtsextreme NSU. De Afkaten vun de Anklaagte Beate Zschäpe hebbt för den tweten Verhandlungsdag künnig maakt: Dat warrt nee'e Andrääg geven. Vör een Week harrn se en Befangenheits-Andrag gegen de Richters stellt. Man dat hett nich klappt. Neven Tschäpe staht veer Lüüd vör't Brett, de de Terrorgrupp holpen hebben schöölt.

Demografie-Drapen geiht los

Berlin. De Bunnsregerung will vundaag op dat twete Demografie-Drapen doröver snacken, wat dat heet, dat de Gesellschaft jümmers öller warrt. Bunnskanzlerin Merkel, Lüüd ut ehr Kabinett, Wetenschaftlers, Börgers un Vertreders vun Sozialverbänn warrt in Berlin tohoop kamen. Verleden Harvst bi dat eerste Drapen sünd negen Arbeitsköppels insett worrn, de nu vertellen schöölt, wat dorbi rutsuert is. Dor is utrekent worrn, dat Düütschland bet 2060 een Föffdel vun de Bevölkerung verleren warrt. Jede Drütte warrt denn 65 Johr oder öller ween.

Jede drütte Kind in de Vörschool bruukt Hölp bi't Spraak lehren

Bremen. In't Bunnsland Bremen bruukt opstunns jede drütte Vörschoolkind Hölp to lehren richtig düütsch to snacken. Dat hett de Bremer Bildungsbehöörd künnig maakt. In enige Bremer Stadtdelen mutt sogor jede twete Vörschoolkind Stütt bi't düütsch lehren kriegen. Vörher weer vermellt worrn: jede verte Grundschöler in Hamborg un fast jede föffte in Nordrhein-Westfalen snackt tohuus meist keen Düütsch.

"Alexander vun Humboldt" wedder dor

Bremerhaben. Dat Dreemastschipp "Alexander vun Humboldt" is torüch in Bremerhaben. Dat hett de Havenmeesteri vermellt. Dor schall dat Schipp nu op en Warft instand sett warrn. Bet Enn 2011 höör dat Schipp to de Düütsche Stiftung Sail Training. De Stiftung hett dat denn an en Ünnernehmer verköfft. För dat Schipp is de nee boote "Alexander vun Humboldt II" insett worrn.

Dat Weer

Un woans süht dat ut mit dat Weer umto? Opstunns hebbt wi in Emm 9 Graad, in Bremen un Bremerhaben 10 un in Veern 11 Graad. Vundaag schient eerst immer mal wedder de Sünn, blots twüschendör kann dat schuern. Man an den Namiddag treckt mehr Wulken op un vun baven kümmt immer wedder wat Nattes. Dat blifft köhlig bi 13 Graad. De Wind dorto weiht in Maten vun de süüdwesten Kant. An den Avend dreiht he op Süüdoost. Wenn dat schuert blaast de Wind düchtig. Tokamen Nacht: immer noch Wulken un Schuer bi 9 Graad. Morgen: Toeerst Sünnschien. Över Dag treckt Schuer op, mag ween ok mit Blitz un Dunnerslag. Dat Thermometer klattert op 21 Graad. In de tokamen Daag wesselt sik Sünn un Wulken af, dat kann ok Schuer un Gewidder geven. Dat weern de Narichten. Op Platt trechtmaakt un vörleest vun Christiane Ehlers. Tohoopstellt hett jüm Ulrike Müller.