Plattdeutsche Nachrichten

De Plattdüütschen Nahrichten vun'n 15. Mai 2013

Plattdüütsch Nahrichten vun'n 15. Mai 2013, [3:43]

Metallers hebbt en neen Tarifverdrag

München: De Industriegewarkschopp Metall un de Arbeitgevers hebbt sik verleden Nacht enigt: dat gifft en neen Tarifverdrag. Mehr Geld kriegt de Mitarbeiders in de Metall- un Elektroindustrie in twee Stappen. Düt Johr in'n Juli kriegt se 3,4 Perzent mehr. Un tokamen Johr in'n Mai noch mal wedder 2,2 Perzent. Eerstmal gellt de nee Tarifverdrag blots för Bayern. Man normaal övernehmt de annern Tarifbezirken düsse Oort vun Vörlöper-Afsluss.

Weniger Arbeitssteden bi Thyssen/Krupp

Essen: De Thyssen/Krupp-Konzern is teemlich in de Kniep. Dorum wüllt se 3000 Arbeitssteden in de Verwaltung wegstrieken, 1500 dorvun in Düütschland. De meisten in de Hauptverwaltung in Essen. Künnigen wüllt se aver nüms. Thyssen/Krupp will so in de tokamen dree Johr 250 Millionen Euro insporen. In't letzte Geschäftsjohr harr dat Ünnernehmen mehr as 800 Millionen Minus maakt.

Striet bi de Bremer Polizei

 Bremen: Bi de Bremer Polizei striedt sik de Böversten mit de Mitarbeiders. Schandarms, de för den Nootfall praatstaht, harrn drauht: Se wörrn mit Willen de Arbeit liggen laten. Wat dor achter stickt: De Bremer Senaat harr künnig maakt: Wat as Tarif in ganz Düütschland gellt, dat schull in Bremen nich oder blots to'n Deel umsett warrn. Nu hett Polizei-Baas Müller mit de Fuust op'n Disch haut un anseggt: siene Beamten mööt so arbeiten as vörher ok.

Keen Unnerricht vunwegen Personaalversammeln

Bremen: Vundaag maakt de Lehrers, de Beamten sünd, jümehr Personaalversammeln. Dorum fallt an de Bremer Scholen de een oder anner Stunn ut. De Lehrers wüllt dörsetten, dat för se ok de Tarifverdrag för de angestellten Schoolmesters gellt. Op jeden Fall schall vundaag op de Grundschölers in Bremen oppasst warrn. Dat hett de GEW, dat is de Gewarkschopp vun de Lehrers, toseggt.

NSU-Perzess löppt wieder

München: Ok för den drütten Dag bi den Perzess um de Morde vun de Neonazi-Grupp NSU rekent se wedder mit enige Andrääg vun de Verteidigers. De Avkaten vun Beate Tschäpe, um ehr geiht dat to allereerst in de Perzess, bekriddelt to'n Bispeel, wat för Ersatzrichters op de List staht. De övernehmt, wenn een vun de Richters utfallt. Güstern harr de Staatsanwaltschopp ehr Anklaag vörleest gegen de Fro, vun de seggt warrt: Se is Rechtsterroristin.

Schaaf höört op bi Werder

Bremen: Trainer Schaaf geiht weg vun Werder Bremen. Dat hett de Vereen jüst vermellt. Vörher harr de Geschäftsföhrung mit den Coach snackt. 14 Johr lang weer Schaaf de eerste Trainer bi den SV Werder. Verleden Sünnavend harr Werder dat schaft, dat se in de eerste Bunnsliga blievt.

Dat Weer

Un woans süht dat mit dat Weer umto ut? Opstunns hebbt wi in Bremen 14 Graad, in Bremerhaven un in Ollenborg sünd dat 15 un in Staad 16 Graad. Vundaag: Veel Sünnschien, ok wenn dat twüschendör noch mal pladdern kann. An'n Namiddag treckt vun Süüdwesten her mehr un mehr Regenflagen ran, ok mit Blitz un Dunnerslag. Dat kann ok för dull pladdern, mag ween ok mit Hagelschuer. Dat Thermometer krabbelt op 22 bit 24 Graad. De Wind dorto weiht in Maten vun de süüdoosten bit süden Kant. Wo dat pladdern un gewiddern deit, blaast störmsche Böen. Tokamen Nacht: Mal mehr, mal weniger Wulken. Ok wedder mit den een oder annern Schuer. Dat köhlt af op 12 Graad. Morgen: Fründlicher mit en poor Wulken. De Schangs op Regen oder Gewidder is man lütt. Freedag un an't Wekenenn: Wulken mit Sünnschien, 16 bit 19 Graad. Dat weern de Narichten. Op Platt trechtmaakt un vörleest vun Reinhard Goltz. Tohoopstellt hett jüm Karsten Ohl.