Plattdeutsche Nachrichten

De Plattdüütschen Nahrichten vun'n 16. Mai 2013

Plattdüütsch Nahrichten vun'n 16. Mai 29013, [3:04]

Schoolmesters in Bremen laat de Arbeit liggen

Bremen: Lehrers, de Beamten sünd, gaht op de Straat, üm to protesteren. De Schoolmesters wüllt, dat för se ok de Tarifverdrag gellt, de de angestellten Lehrers uthannelt hebbt. Op´n Marktplatz in Bremen verlangt jüst nu 1.000 Lüüd vun de Afordneten in de Börgerschaft, se schüllt in´t Parlament "Ja" to mehr Geld seggen. De Senaat will avers Geld sporen. Dorüm schüllt de Beamten weniger kriegen.

De Maizière: Reform vun de Bunnswehr maakt veel anners

Berlin: De Minister för´t Verdeffenderen, de Maizière, hett de Bunnswehr-Reform as groten Wannel nöömt. Allens hett vör dree Johr anfungen. He sä in´n Bunnsdag, dat geiht üm de Fraag, nu mit den Kolen Krieg ok politisch Sluss to maken. De Reform is goot, meent de Minister. De CDU-Politiker wull sik op Kritik nich inlaten.

Wiederkamen bi dat Zellen-Forschen

Nee York: US-Forschers hebbt sülven vermellt, se hebbt to´n eersten Mal Zellen vun´n Minschen so namaakt, as weern dat welk vun lüerlütt Kinner, de noch nich op de Welt kamen sünd. Se snackt vun en groten Stapp bi dat Kureern vun Krankheeten as de Beverkrankte un de, wo de Knaken weggaht. De Wetenschuppers vun een Hochschool in Nee York wüllt avers kene Minschen namaken, hebbt se seggt.

Vagelgripp in´n Kreis Vechte

Lavern: In en Bedriev för Höhner in´n Kreis Vechte is de Vagelsüük utbraken, de avers nich so leeg is. De Behörden hebbt künnig maakt, 11.000 Deerten mööt dootmaakt warrn. Se seggt, jüst nu gifft dat keen Gefohr för Minschen.

Een Mann steiht wedder vör´t Brett vunwegen Moord

Staad: Een Mann, de 78 Johr oolt is, hett sin Fru dootschaten. Se harr sik op´t Ohr leggt un is denn angrepen worrn. Nu steiht de Mann noch mal wedder vör´t Brett. He harr de Saak togeven. Sin Fru wull starven, sä he. Dat weer passeert in Junimaand 2009. Dat Landgericht Veern harr oordelt, he schall för 2 ½ Johr achter Trallen. De Bunnsgerichtshoff hett denn avers seggt, dat Oordeel gellt nicht. In Staad geiht dat nu üm Moord un nich mehr üm Dootmaken op Verlangen.

Dat Weer

Nu kaamt wi to dat Weer: Opstunns hebbt wi an´n Flegerhaven in Bremen 13 un in Bremerhaven 12 Graad. In Emm sünd dat 10 un in Ossenbrüch 11 Graad. Vundaag gifft dat en poor Wulken, toeerst is dat noch fründlich. Later mööt wi wedder mit Schuers un ok mit Blitz un  Dunnerslag reken. Dat Thermometer krabbelt op 20 bet 22 Graad. De Wind weiht flau oder mit Maten vun de noordoosten bet oosten Kant. In de Nacht sünd to´n Deel vele Wulken ünnerwegens, avers nich mehr mit so vele Schuers. Dat köhlt af op 13 Graad. Morgen is dat ok mal Blau mank de Wulken, Regen gifft dat avers ok. Temperaturen jüst so as vundaag. An´n Sünnavend wedder Schuers mit Dunnerslag, blots 14 bet 16 Graad. An´n Sünndag warrt dat wedder en beten warmer. Dat weern de Narichten op Platt, trechtmaakt un vörleest vun Holger Zantopp, tohoopstellt hett jüm Karsten Ohl.