Plattdeutsche Nachrichten

De Plattdüütschen Nahrichten vun'n 17. Mai 2013

Plattdüütsch Nahrichten vun'n 17. Mai 2013, [3:21]

Altmaier finnt gode Wöör in de Debatt üm Atoom-Endlager

Berlin: Bunnsümweltminister Altmaier hett seggt, dör dat Söken na en Endlager för den atomaren Schietkraam in´t ganze Land ännert sik veel in de düütsche Atoompolitik. Wi sünd op en Brett kamen, dat is so deep as noch nienich vörher, sä de CDU-Politiker in´n Bunnsdag. In verleden Tieden weern vele in de Debatt üm en Endlager nich dormit inverstahn, blots na Gorleben to kieken. Bund un Länner wüllt nu allens bekannt maken, wenn dat üm annere Steden geiht, seggt Altmaier.

Bunnsdag seggt Ja to den nee´en Pünktplaan

Berlin: För all Lüüd, de bi dat Autofohren nich oppasst, gifft dat nee´e Regeln. De Bunnsdag hett de Pünktplaan ännert. Bet nu hett dat een bet söven Pricken geven. In Tokunft geiht dat blots noch üm dree Stappen. Den Föhrerschien kann een al bi acht Pricken verleren un nich mehr bi achtteihn, so as dat bet nu weer. Verkehrssünners köönt vun sik ut en Kurs besöken, üm en Deel vun de Pricken aftoboen. De Bunnsraat mutt noch Ja to den Pünktplaan seggen.

Warrt eenfacher för Asylbewerbers to arbeiten

Berlin: All Lüüd, de Asyl in Düütschland söökt, schüllt arbeiten könen. Seggt warrt, de Bunnsregerung will dat nu för Asylbewerbers eenfacher maken. De Süüddüütsche Zeitung vermellt, Butenlanners, de bet nu dullt warrt, de köönt in  Tokunft na veer Johr een Job annehmen, ahn dat de Bunnsagentur för Arbeit tostimmt. Bet nu muss de Agentur "Ja" seggen.

Paare vun´t sülvige Sort kaamt leger bi weg

Den Haag: Twee Mannslüüd oder twee Froenslüüd, de sik geern hebben, mööt in Europa jümmers noch dormit reken, dat se leger bi wegkaamt. Dat hett de Europääsch Union rutfunnen. Se sünd de Saak op´n Grund gahn un weet nu, vele köönt nich würklich all Korten op´n Disch leggen. Een Veertel hett angeven, se weern in de verleden Johren angrepen worrn oder Lüüd harrn mit Gewalt drauht. Mehr as 93.000 Minschen sünd utfraagt worrn.

De Werserdiek is meist fardig

Bremerhaven: De Arbeiten an´n Werserdiek twüschen den Deertengoorn an de See un de Geeste hebbt se binah to Enn bröcht. Op en Längde vun 800 Metern is de Diek üm twee Meter högersett worrn. De Breetde hebbt se üm mehr as teihn Meter grötter maakt. De Stadt is vörsichtig, denn vunwegen den Klimawannel kunn dat Seewater stiegen. Üm un bi söss Millionen Euro sünd för den Diekbo utgeven worrn. De Bund betahlt den gröttsten Deel.

Dat Weer

Nu kaamt wi to dat Weer: Opstunns hebbt wi an´n Flegerhaven in Bremen 13 un in Bremerhaven 12 Graad. In Ollnborg un Vechte sünd dat 11 Graad. Vundaag wedder vele Wulken, de Sünn is nich so faken to sehn. Bet to´n Avend blifft dat woll dröög. Mag avers ween, dat kummt ok to Schuers, Blitz un Dunnerslag. Dat Thermometer krabbelt op 23 Graad, in Bremerhaven blots op 19 Graad. De Wind weiht flau oder mit Maten ut de westen Kant, an´n Avend ok frisch vun de noordwesten Kant. Morgen wedder Schuers mit Dunnerslag, bet 16 Graad. Pingst-Sünndag kummt de Sünn rut, Temperaturen üm un bi 20 Graad. Pingst-Maandag warrt dat wedder köhliger, ok mit Schuers. Dat weern de Narichten op Platt, trechtmaakt un vörleest vun Holger Zantopp, tohoopstellt hett jüm Ulrike Müller.