Plattdeutsche Nachrichten

De Plattdüütschen Nahrichten vun'n 21. Mai 2013

Plattdüütsch Nahrichten vun'n 21. Mai 2013, [3:43]

Gauck in Bremen

Bremen: För Bunnspräsident Gauck hett sien Antrittsbesöök in't Land anfungen. Dat Motto vun de Visit is "Water, Wind un Wannel". Gauck is toeerst in Bremerhaven. Dor kickt he sik dat Klimahuus an un he is Gast in den Fischereehaven bi den Windanlagen-Boer "Weserwind". In Bremen kummt Gauck na dat Raathuus un de Börgerschopp. Achteran geiht he to Foot dör Osterholt-Tenever. Dor sett he sik ok mit Lüüd, de dor wahnt, an een Disch un snackt mit jem.

Mächtigen Tornado in Oklahoma

Oklahoma City: En mächtigen Küselstorm hett in den mittleren Süden vun de USA bösen Schaden anricht. De Behörden seggt: Tominnst 91 Minschen sünd to Dode kamen. Söven Kinner hebbt se doot in en School funnen, de heel un deel twei weer. De Tornado weer um un bi dree Kilometer breet. Dor binnen weer de Wind mit bet 320 Stunnenkilometer in de Gang. In den Streek, över den de Storm weggahn is, hebbt över 17.000 Minschen wahnt. In't Fernsehn sünd vele kaputte Hüüs to sehn. Präsident Obama hett för de Gegend dor den Nootstand utropen.

Woso hett dat kene Narichten över Euro-Hawk geven?

 Berlin: Wo dat Drohnen-Projekt Euro-Hawk ut de Welt is, kriggt Bunnsverteidigungsminister de Maizière mehr un mehr Wind vun vörn. De Wissenschaftliche Deenst vun den Bunnsdag meent: Dat dat Verteidigungsministerium Angaven to dat Drohnen-Projekt trüchhollen hett, dat weer nich rechtens ween. In't Verteidigungsministerium harrn se seggt, se kunnen gor nich anners. In den Verdrag mit de USA stunn en Swieg-Still-Punkt binnen. Verleden Week harr de Maizière dat Euro-Hawk-Projekt en P vörsett, wo de Drohn keen Schangs hett, dat se överhaupt över Düütschland flegen dröff. Bet nu hebbt se dor över 560 Millionen Euro rinsteken.

De eersten Stolberg-Hüüs op Spiekeroog verköfft

Spiekeroog: Op de Insel sünd de eersten Hüüs vun den fröhern Bremer Reeder Stolberg verköfft worrn. Geschäftslüüd vun Spiekeroog hebbt den Bökerladen Inselzauber un den Kroog mit densülvigen Naam in de Mitt vun't Dörp övernahmen. Tohöört hebbt de to Stolberg sien Immobilien-Firma, de Wunnervulle Ferien- un  Vermögensverwaltung.

Na Motorrad-Unfall: Polizei unnersöcht

Bremerhaven: Wo dat bi dat Fischereehaven-Rennen en Doden geven hett, unnersöcht de Kriminalpolizei nu de Saak. En Motorradfohrer ut de Nähgde vun Hamborg weer güstern Nameddag to Malöör kamen. Lüüd, de dorbi weern, seggt: De Mann vun 21 Johr weer in en Krümm vun de Fohrbahn afkamen un denn över Kopp gahn. För dat gröttste düütsche Stratenrennen för Motorrööd weer dat dat 56. Johr. To Dode kamen weer bet nu noch nüms.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Rotenborg un op Wangeroog överall 13 Graad. Vundaag: Meist överall vele Wulken, un hier un dor kann dat ok mal pladdern. Dat blifft ok mal en Tietlang dröög, man de Sünn kriegt wi meist gor nich to sehn. Dat Thermometer schafft dat nich över 15 bit 17 Graad ruut. De Wind dorto weiht flau oder en beten mehr vun de westen bet noordwesten Kant. Tokamen Nacht: Vele Wulken mit ganz veel Regen. Gegen Morgen en beten wat dröger. Dat köhlt af op 8 Graad. Morgen: Jümmers noch Wulken över Wulken. Dat pladdert, man denn is dat ok mal wedder en Tietlang dröög. Blots noch 12 Graad. Ok Dunnersdag: koolt, an'n Nameddag nich mehr as 11 bet 13 Graad. Vele Wulken, en beten Sünnschien, un af un an ok wedder Regen. Dat weern de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ulrike Müller.