Plattdeutsche Nachrichten

De Plattdüütschen Nahrichten vun'n 22. Mai 2013

Plattdüütsch Nahrichten vun'n 22. Mai 2013, [2:52]

Bankgeheemnis schall dat nich mehr geven

Brüssel – De EU-Staaten wüllt mehr Druck op Stüerbedräger maken.  An'n Nahmiddag hollt de Staats-un Regeernbaas darto Raat in Brüssel. De Gesette schüllt scharper weern. Buterdem schall dat för utlännische Kunnen keen Bankgeheemnis mehr geven. Vör allens Österriek un Luxemborg wullen dat nich, nu hebbt se "Jo" darto seggt.

Binnenminister hollt Raat över NSU-Terror

Hannober – Över de rechtsextreme Terrorgrupp NSU snackt an'n Nahmiddag de dütschen Binnenminister. Op ehr Drepen in Hannober geiht dat vör allens üm de Tokunft vun'n Verfatenschutz. De ward kriteseert, wieldat dat sware Pannen in'n Tosamenhang mit de Moord-Reeg vun de NSU geven hett. Snacken köönt se ok över dat, wat dat ARD-Magazin "Report Mainz" vermellt: darnah harrn de dütschen Sekerheitsämters  de Rechts-Terroristen Böhnhardt, Mundlos un Zschäpe all in't Jahr 2000 op'n Kieker. Woso Bunnesanwaltschupp un Polizei nich ermiddelt hebbt, is bitnu nich klaar.

Druck op Maiziere ward grötter

Berlin – In de Affair üm de Euro-Hawk-Drohne smiet de Oppositschon Verdeffenderenminister de Maiziere wieter wat vör. De SPD-Verdeffenderen-Fackmann Arnold sä to de Stuttgarter Zeitung, de CDU-Politiker mutt klaar maken, wokeen de Verantwurten övernimmt, dat dat Projekt nich klappt hett. Grönen-Fraktschonsbaas Trittin meent, de Maiziere harr enkelte Saken nicht vertellt un dat weer gegen dat Gesett. Ok de Bunnesreeknungshoff harr kriteseert, dat Ministerium harr nich allens vermellt.

Böhrnsen reist in de Türkei

Bremen – Börgermeister Böhrnsen fangt an'n Middag een Türkei-Reis an. In de tokamen veer Daag will he dat Band twüschen Bremen un de Türkei mehr Stütt geven. Bi em sünd 22 Vertreder vun Politik un Wertschupp. In Ankara dreept Böhrnsen den stellvertreden türkschen Ministerpräsidenten Bozdag. De Grupp besöökt ok Bremens Partnerstadt Izmir. Dar geiht dat ünner annern üm de Tosamenarbeit mit de Polizei.

Dütsch-nedderlännsche Suldaten ward gemeinsam Trupp

Düsseldorp – Nedderlännsche Suldaten ward to'n ersten Mal Deel vun een Bunneswehr-Trupp, dat schrievt de "Rheinische Post". Dat hannelt sik darnah üm 4500 Fallschirmjägers ut Holland. De Bunneswehr stellt de Trupp to'n Beginn vun 2014 vun Amts wegen in Hessen in Deenst. Verbänne, de darmit to verglieken sünd, gifft dat bitnu blots in den USA un in Grootbritannien.

Dat Weer

Un nu een Blick op dat Weer: an den Bremer Flegerhaben, in Deefholt un in Ollenborg 8, an de Fischereehabenslüüs in Bremerhaben sünd dat opstunns 9 Graad. Erst is dat hüüt wulkig, later kummt aver noch een beten de Sünn dör bi 12 Graad. Tokamen Nacht sackt dat Thermometer op 4 Graad. Morrn mal so, mal so mit Schuers, blots noch 11 Graad. An'n Donnerdag un Freedag ännert sik dat Weer meist nich. Dat weern de Nahrichten op platt. Gerrit Busch hett se tohoopstellt. Op platt trechtmaakt un vörleest hett se Heidi Jürgens.