Plattdeutsche Nachrichten

De Plattdüütschen Nahrichten vun'n 23. Mai 2013

Plattdüütsch Nahrichten vun'n 23. Mai 2013, [3:25]

SPD warrt 150 Johr oolt

Leipzig: De SPD hett wat to fiern, de Partei is nu 150 Johr oolt. To en Fierstünn in Leipzig kaamt 1.600 Gäst ut 80 Staaten. Bunnskanzlersch Angela Merkel un de Präsident vun Frankriek, Francois Hollande, sünd ok dorbi. Nich to vergeten Helmut Schmidt un Gerd Schröder, de weern ok mal Kanzler. As de SPD op de Welt kamen is, dor hett sik de Partei noch nöömt: Allgemeen Düütscher Arbeiter-Vereen. Ferdinand Lassalle hett dat vör 150 Johr in Gang sett. Later is ut den Vereen de SPD worrn.

Alarm in London vunwegen Terror

London: De Lüüd in de Hauptstadt vun Grootbritannien sünd bang, nadem en Suldaat op en Straat dootsteken worrn is. Twee Mannslüüd hebbt dat daan, seggt de Polizei. De Schandarms hebbt op de beiden schaten, se hebbt dor böös wat afkregen. De Regerung in London meent, wat dor achter stickt, dat is Terror vun radikaal-islaamsche Lüüd.

Gifft nich so vele Wahnungen för wenig Geld

Bremen: In de Stadt sünd Wahnungen knapp, de de Lüüd ok betahlen köönt. Nu hett de SPD-Politiker Jürgen Pohlmann togeven, in de verleden Johren is to wenig daan worrn. För Lüüd, de meist nix in de Melk to krömen hebbt un för Hoochschölers gifft dat nich so vele Wahnungen, sä de Börgerschafts-Afgeordnete in´t Radio-Bremen-Fernsehn. He will, dat sik dat ännert. Güstern harr de Organisatschoon vun de Hoochschölers wohrschaut, vun Harvst af an kann Bremen nich so vele Wahnplätz anbeden.

Striet üm Geld för Beamte

Bremen: De Arger twüschen de Beamten un den Senaat is eernster worrn. De Gewarkschaft vun de Polizei will fiern, denn de Organisatschoon gifft dat nu siet 50 Johr. Se laat sik hoochleven, avers ahn de Lannsregerung. Wat dor achter stickt, dat is de Striet üm dat Geld. Bremen will nich, dat de Beamten so veel kriegt as de Anstellten in´n Staatsdeenst. Butendem is de Gewarkschaft füünsch op Finanzsenatersch Linnert. Se harr seggt, de Protest vun de Beamten is en Kinnergoorn.

Werder verhannelt mit Robin Dutt

Bremen: As dat lett, will de SV Werder Robin Dutt as Trainer inspannen. He schall Nafolger vun Thomas Schaaf warrn. En poor Medien hebbt vermellt, de Böversten vun Werder sünd mit den DFB-Sportdirekter Dutt tosamenkamen. Dutt weer fröher Trainer ünner annern in Leverkusen. Verleden Week harr sik de Football-Bunnsligist Werder Bremen na 14 Johr vun Thomas Schaaf loosseggt.

Dat Weer

Nu kaamt wi to dat Weer: Opstunns hebbt wi an´n Flegerhaven in Bremen, in Bremerhaven un ok in Emm acht Graad. In Vechte sünd dat söven Graad. Vundaag wesseln sik Sünn un Wulken af, dat gifft avers ok wedder en poor Schuers. An de Küst lacht de Sünn en beten mehr as in´t Binnenland. Dat Thermometer krabbelt op teihn bet twölf Graad. De Wind weiht flau, toeerst vun de süüdwesten Kant, later ut anner Richt. In de Nacht treckt de Schuers af, de Wulken warrt weniger. Dat köhlt af op söven bet dree Graad. Morgen meisttiets jüst so as vundaag bi dörteihn Graad. An´n Sünnavend blifft dat dröög, ok bi dörteihn Graad. Later an´n Avend mööt wi wedder mit Schuers reken. An´n Sünndag regent dat to´n Deel afsünnerlich dull, nich warmer as twölf Graad. Dat weern de Narichten op Platt, trechtmaakt un vörleest vun Holger Zantopp, tohoopstellt hett jüm Thorsten Reinhold.