Plattdeutsche Nachrichten

De Plattdüütschen Nahrichten vun'n 24. Mai 2013

Plattdüütsch Nahrichten vun'n 24. Mai 2013, [3:00]

Obama dreiht bi bi de Drohnen

Washington: US-Präsident Obama will in sienen Kurs bidreihen, woans tegen lilleke Lüüd tegenangahn warrn schall. He hett in een Anspraak seggt, dor schüllt minner Drohnen in't Butenland insett warrn un dat Spill schall nipp un nau bekeeken warrn. Butendem will Obama noch mal versöken, dat US-Kaschott Guantanamo up Kuba dichte to maken. Dorför bruukt Obama man ok de Hölp vun den amerikanschen Kungress.

De Maiziere vertellt mehr över de Rüstenssaken

Berlin: De Bunnsminister för Verdeffendeern de Maiziere, de will nix dorvun weeten, wat em vörsmeten warrt. Nee, seggt he, he hett nich to laat een Hollstopp sett bi de Drohnensaak Euro Hawk. In'n Düütschlandfunk hett de Maiziere seggt, dat geev överhaupt keen Rüstungssaken, wenn dor elkeen Mal forts de Saak anhollen warrt, wenn Malessen upkaamt. De Verdeffendeerminister kunn aber in tokamen Tieden fakener den Bunnsdag vertellen, wenn dor wat bi de Rüstungssaken nich slumpt. Bit nu hento weer dat bold nienich künnig daan worrn. Man he wull dat nu ännern.

Weer Krawall in Stockholm

Stockholm: De Krawall in de swedsche Hauptstadt geiht wieder. Ok in de föffte Nacht in een Reeg weern weer Upsternaatsche up de Straten vun Stockholm. Junge Lüüd hebbt weer Autos un Hüüs in Brand sett. De Polizei hett mehrere Minschen fastnahmen. Achter de Krawalleree stickt, dat in wat Veerdel vun Stockholm veele Minschen leevt, de inwannert sünd un de nu keen Arbeit hebbt.

Mehr Lüüd fastnahmen

London: De britsche Polizei hett mehr Lüüd fastnahmen, vun de se meent, se harrn lilleke Saken maakt. Dat sünd een Mann un eene Fru un se sünd vermoden, wat de beiden wat mit den Mord an eenen Suldaten in London to kriegen hebbt. De beiden, de se vör allen in Verdacht hebbt, de sünd ehrgistern na de Saak anschaten worrn un liggt in't Krankenhuus. Upstunns unnersöökt se, of de Mord maakt worrn is vun enkelde Lüüd of vun een Grupp vun lilleke Lüüd.

Autobahnbrügg in de USA instört

Seattle: In den US-Bunnsstaat Washington is eene Autobahnbrügg to'n Deel instört. Mehrere Autos sünd sowat fiefundörtig Meters deep in een Waterloop fullen. Bit nu hento hebbt de Reddenslüüd dree versehrte Minschen ut't Water trocken. De Brügg up de Lien twüschen Seattle un Vancouver is in de föfftiger Johren buut worrn. Verleden Johr hett se slechte Tallen kreegen bi een Unnersöken.

Dat Weer

Un so deep steiht dat Thermometer upstunns: in Cuxhaben bi söben, an de Fiskereehabenslüüs in Bremerhaben un an'n Bremschen Fleegerhaben bi acht un in Demmörst bi negen Grod. Hüüt wesselt Sünnschien un Wulken un dat schuert blots verenkelt 'n beten. Bi sowat dörteihn Grod weiht de Wind man mau un mal vun hier un mal vun dor. Tokamen Nacht toerst klar un up de Morrn to kaamt weer Wulken up un dat geiht up fief Grod daal. Morrn bit to de Middagstiet drög bi dörteihn Grod, man denn kummt Regen up un de will un will nich uphollen. An'n Sünndag wieder Regen bi blots noch twölf Grod. De niege Week is wieder natt, man dat warrt lütt bi lüüt 'n beten warmer. Dat weern de Narichten. Karsten Ohl hett se tohoopstellt. Up Platt trechtmaakt un vörleest hett se Gesine Reichstein.