Plattdeutsche Nachrichten

De Plattdüütschen Narichten vun'n 2. Oktober 2017

Plattdüütsch Narichten vun'n 2. Oktober 2017, [3:08]

Katalanen för Allennigstahn

Barcelona: In Katalonien hett eene grote Mehrheet vun de Minschen dor bi een Volksafstimmen seggt, se willt ehr Flach allennig ahn Spanien hebben. De Regionalregeern in Barcelona hett vermellt, negentig Perzent vun de Stimmen weern dorför. Man blots de Hälfte vun de Lüüd, de harrn afstimmen kunnt, hebbt dat ok daan un dat weern twee Komma dree Miljonen. Ãœm düsse Volksafstimmen hett dat een „hen“ un „weer“ geven un de spansche Polizei hett güstern to’n Deel mit Gewelt versöcht, de Lüüd vun de Afstimmen weg to brengen un mehr as achthunnert Lüüd sünd dorbi an’t Liev versehrt worrn.

Wichtige Bahn-Lien weer free

Baden-Baden: De wichtige Rheindaal-Bahnlien in Baden-Württembarg is weer klaarmaakt un free. Is knappan twee Maant her un do weer den goot tweehunnert Meter langen Strang bi de Arbeit an een Tunnel afsackt. Se hebbt de Gleise weer nej leggen müsst. Vör allen bi den Frachtverkehr hett de Saak bannig Malessen maakt. De Lien is de wichtigste Nord-Süd-Stremel för den Frachtverkehr in Europa.

CSU will Heel-un-deel-verbargen verbeden

München: De CSU will nu verbeden, wat Fruens sick heel un deel verbargt, so as in Österriek, wo dat siet güstern nich mehr verloovt is, dat Gesicht to verstoppen. CSU-Generalsekretär Scheuer hett an de Passauer Niege Press seggt: „Wi geevt us Eegenwesen nich up.“ De Burka dee nich to Düütschland hören. Anner Lüüd in de Union meent, een Verbott vun de Burka weer tegen de Verfaten.

Islamschen Staat hett dat in Marseille verbraken

Marseille: Den finienschen Kring Islamschen Staat hett weeten laten, dat he dor achter stickt, wat in Marseille Lüüd mit een Mess angreepen worrn sünd. Een IS-Narichtenkuntor hett seggt, de dat daan harr weer een Suldat vun den IS west. De Mann harr güstern Namiddag in Marseille twee Fruens dootstaken un is dorna vun Suldaten dootschaten worrn.

Perzess in Malaysia hett anfungen

Kuala Lumpur: In Malaysia hett den Perzess anfungen tegen twee Fruens. Se schüllt den Halvbroder vun Nordkoreas Machthebber Kim Jon Un dootmaakt hebben. De Fruens warrt vörsmeeten, se harrn Kim Jong Nam mit een Lappen an’n Fleegerhaben in Kuala Lumpur vergift. De beiden seggt aber, se harrn dat för eene Kiekkassen-Saak as verstoppte Kamera hollen. Een Mann harr ehr fragt, of se Kim Jong Nam verschricken kunnen.

Nachricht 6: Dat Weer

Un so steiht dat Thermometer upstunns: in Osterholt-Scharmbeck bi dörteihn, an’n Bremschen Fleegerhaben un an de Fiskereehabenslüüs in Bremerhaben bi veerteihn un up Wangerooge bi föffteihn Grod. Hüüt is dat erst natt, later an’n Namiddag kann de Sünn noch dörkamen bi sössteihn bit achtteihn Grod. De Wind weiht mit Maten bit frisch, an de Küst ok stiev ut de Richt Südwest, verenkelt ok mit Stormböjen. Tokamen Nacht treckt weer Schuers över’t Land bi twölf bit teihn Grod. Morrn gifft dat veele Wulken, af un an ok een beten Sünnschien un Schuers bi föffteihn bit sössteihn Grod. Up Middeweeken minner Schuers, man ok minner Sünnschien bi föffteihn Grod un an’n Donderdag Wulken un Regen bi rusigen Wind un dörteihn Grod. Dat weern de Nahrichten. Jan Siegert hett se tohoopstellt. Op Platt trechtmaakt un vörleest hett se Gesine Reichstein.