Plattdeutsche Nachrichten

De Plattdüütschen Narichten vun'n 30. Oktober 2017

Plattdüütsch Narichten vun'n 30. Oktober 2017, [3:05]

Jümmer noch Malessen mit den Storm

Bremen: De Saken, de mit den Storm „Herwart“ ranbruust sünd, de maakt jümmer noch Malessen in’n Verkehr. Bi de Bahn sünd de Törns wieder weg jümmer noch to laat of se fallt heel un deel ut. Dat is so in Hamborg un ümto un Lüüd, de vun Bremen runner in’n Ruhrpott willt, de mööt över Hannober föhren. De Lienen in den Verkehr dichtebi loopt aber tomehrst.

Frachtschipp up Grund lopen

Langeoog: Milln in den Storm „Herwarth“ is vör dat ostfreessche Eiland een Frachtschipp up Grund lopen. Dat Schipp harr nix ladt, hett sick aber losmaakt un liggt nu in de Düütsche Bucht. An Bord sünd sowat twintig Lüüd un ehr geiht dat sowiet goot. Se hebbt all versöcht, dat Schipp to bargen, man slumpt hett dat nich. Woll hett dat Schipp nix ladt, man dor sünd knappan tweedusend Tünnen Swaarölje an Bord.

Wieder snacken över eene Koalitschoon

Berlin: De Politikers snackt hüüt wieder doröver, of se eene Jamaika-Koalitschoon trechtbögen köönt. In eene lütt Runn snackt de Union, de FDP un de Grönen hüüt bian anner Saken över de Saken Billen, Arbeit, Gesundheet un Binnenpolitik. Later an’n Namiddag kaamt denn sowat föfftig Lüüd tohoop un de willt denn tohooptrecken, wat bitto rutsuert is.

Dwangsregeern in Katalonien

Barcelona: Dat spaansche Flach Katalonien warrt vunaf hüüt mit Dwang regeert. De Ministers un Ämters arbeit erst mal na de Odder vun de spaansche Regeern. Se harr de katalonsche Regeern an’t Weekenenn afsett, as dat Parlament in Barcelona dat Flach Katalonien för allennig verklaart harr. In Barcelona sünd güstern sowat dreehunnert-dusend Minschen up de Straat gahn un de willt een eenig Spanien hebben.

Werder-Öbensmester Nouri mutt gahn

Bremen: De Lüüd, de bi den Football-Bunnsliga-Vereen Werder Bremen dat Seggen hebbt, de hebbt den Öbensmester Alexander Nouri vun’n Posten haalt. Güstern harr de Footballmannschupp vun Werder Bremen mit null to dree tegen Augsborg verlaren un nu steiht de Manschupp up de vörlesde Stee in de Liga. Keen na Nouri de Mannschupp up de Been helpen schall, weet noch nümms. Se spickeleert noch över Naams as Labbadia, Weinzierl of André Schubert. Kann angahn un för dat Speel tegen Frankfort an’n Freedag helpt erst Mal den U23-Öbensmester Kohlfeldt ut.

Dat Weer

Un so steiht dat Thermometer upstunns: an’n Bremschen Fleegerhaben bi söben, in Osterholt-Scharmbeck, up Wangerooge un an de Fiskereehabenslüüs in Bremerhaben överall bi teihn Grod. Hüüt treckt verenkelt Schuers dör, man de Sünn schient ok, an’n fründlicksten in’n Osten vun de Werser. In Ostfreesland blievt veele dicke Wulken hangen. Bi negen bit ölben Grod weiht de Wind mit Maten ut de Richt Nordwest, sünnerlick an de Nordsee ok mit brusige Böjen. Tokamen Nacht fallt hier un dor een beten Regen of Spütterregen bi acht bit söss Grod. Morrn is de Fierdag ehrder gries un een beten Natts fallt vun baben bi negen bit twölf Grod. Up Middeweeken Wulken un Piesel-Driesel bi veerteihn Grod un an’n Donderdag Wulken, Regen un Sünnschien bi sowat twölf Grod. Dat weern de Nahrichten. Jan Siegert hett se tohoopstellt. Op Platt trechtmaakt un vörleest hett se Gesine Reichstein.