Plattdeutsche Nachrichten

De Plattdüütschen Nahrichten vun'n 28. Mai 2013

Plattdüütsch Nahrichten vun'n 28. Mai 2013, [3:04]

EU seggt: Waffenembargo gegen Syrien gellt nich mehr

Brüssel. De Europääsch Union hett fastleggt: In Tokunft is dat nich mehr verbaden, Waffen an syrsche Oppositschoons-gruppen to levern. De EU-Butenministers hebbt en poor Stünnen lang verhannelt un sünd an't Enn op en Brett kamen. Bet op dat Waffenembargo gellt all Strafen, de dat Assad-Regime kregen hett, ok wiederhen. Öl to'n Bispeel dörv ok wieder nich levert warrn. De enkelten EU-Staaten köönt sülvst entscheden, wat se de Rebellen in Syrien mit Waffen hölpen wüllt, oder nich. Düütschland is immer noch dorgegen.

Rösler will mehr Fachlüüd ut't Butenland ranhalen

Berlin. Bunnswirtschaftsminister Rösler will mehr Fachlüüd ut anner Länner na Düütschland halen. Dat sä Rösler to "Spiegel online". In de Ünnernehmen warrt mehr Lüüd bruukt as goot utbillte düütsche Arbeitnehmers to Hand sünd. Nu sett Rösler dorop, dat mehr Minschen na Düütschland kaamt. Dat Fachlüüd fehlt, warrt en vun de gröttsten Opgaven för de düütsche Wirtschaft, meent de Bunnswirtschaftsminister. In Berlin kummt vun hüüt af an de sösste Integratschoonsgipftel to düsse Saak tohoop.

Bremer Rat & Tat Zentrum kann woll holpen warrn

Bremen. As dat lett, is de Plaan vun den Disch, dat dat Rat und Tat-Zentrum dichtmaakt warrt, de Steed bi de Homosexuellen Hölp finnt. SPD-Fraktschoons-Baas Tschöpe hett künnig maakt, he warrt nich ja seggen to de Plaans vun Gesundheitssenater Schulte-Sasse. De Senater, de to keen Partei mit tohöört, wull all Toschüss för de Steed wegstrieken, dat Geld spoort warrn kann.

Riesen Kraan warrt in Bremen verlaadt

Bremen. In den Neestädter Haven warrt vundaag en 800 Tünnen swore Kraan op en Spezialschipp verlaadt. Dat Ünnernehmen BLG Logistics weet: Dat is dat gröttste Swoorgoot, dat dor bet nu ümslaan woorn is. De Kraan warrt nu na Kanada bröcht. In de verleden veer Maanden weer he an de Kaje tosamenboot worrn.

Hoffenheim speelt wieder in de Bunnsliga

Kaiserslautern. Hoffenheim speelt wieder in de eerste Bunnsliga. De Jungs vun Trainer Gisdol hebbt an den Avend ok dat twete Relegationsspeel gegen Kaiserslautern, de in de twete Liga sünd, wunnen. 2 to 1 heet dat an't Enn. In't Henspeel harr Hoffenheim Kaiserslautern al mit 3 to 1 na Huus schickt.

Dat Weer

Un woans süht dat ut mit dat Weer umto? Opstunns hebbt wi in Bremerhaben 9 Graad, in Bremen un Staa 10 Graad un in Deefholt 12 Graad. Vundaag waagt sik de Sünn endlich mal wedder rut. Över Dag blifft dat dröög. An den Namiddag treckt ut Noordoosten wedder mehr Wulken op. An den Avend kann dat en beten regen. Dat Thermometer klattert op 17 bet 19 Graad. De Wind dorto weiht flau bet in Maten vun de noorden bet noordoosten Kant. Tokamen Nacht: vele Wulken an den Heven. An de Küst en Tiet lang kloor. Blots de een oder anner Schuer bi 11 bet 9 Graad. Middeweek un Dünnersdag wiest sik de Sünn meist nich. Dat kann immer wedder wat Nattes vun baven geven. Bi 16 bet 18 Graad. Dat weern de Narichten. Op Platt trechtmaakt un vörleest vun Christiane Ehlers. Tohoopstellt hett jüm Peter Behrendt.