11. Februar 2011, 8:00 Uhr

Latein-Buchtipps

Hereditas temporum antiquorum

Buchcover: Hartmut Leppin Das Erbe der Antike, Beck Verlag München

Recensuit: Dr. Heinrich Fliedner
Hoc opus est primum seriei decem voluminum, quibus res Europaeae describuntur. Quo in libro proponitur cultum humanitatemque Europaeam derivatam esse e tribus fontibus, antiquitate scilicet Graeca, Romana, Iudaica. Haec doctrina certe est usitata. Sed cuique quid debeatur, auctor scite et docte complectitur tribus vocibus, libertatis, imperii, fidei religiosae verae. Graecorum est libertas, quae primo constabat in iure nobilium, quibus liceret de rebus publicis sententiam ferre; quod postea auctum est, ut omnes cives possent ex aequo decernere in rebus politicis. Neque umquam per totam antiquitatem fuit consensus esse  ius cuiusque hominis esse liberum.

Regna magna primum in oriente fuerunt, neque ullum tam diu tamque late vigebat quam imperium Romanum. Cuius fructus per nonnulla saecula fuerunt pax iustitiaque. Quo exemplo factum est, ut usque in saeculum undevicesimum vigeret Sanctum Imperium Nationis Theodiscae, de quo exspectabatur, ut in eo iuste et pacifice ageretur.

Tertia in libri parte quaeritur, unde factum sit, ut Iudaei censerent non multos deos esse, sed unum eumque, qui curet totum mundum. Omnes, qui aliter sentirent, errare atque esse paganos detestabiles. Id Christiani susceperunt. Eorum autem persuasio se unos esse qui sciant rectum bonumque quid sit, fons erat discordiarum insanabilium. Qua ex re apparet has ideas nostra in tempora pervenisse aliquantum mutatas. Operae pretium sit cognoscere haec omnia subtilius libro perlecto.

Hartmut Leppin, Das Erbe der Antike, Beck Verlag München 2010, (Geschichte Europas Bd. 1), 14,95 Euro

Das Erbe der Antike