1. September 2010, 8:00 Uhr

Latein

Nuntii Latini mensium Iulii et Augusti 2010

Lateinischer Monatsrückblick

Incendia et inundationes

Pakistania et regiones Indiae Sinarumque inundationibus calamitosissimis post hominum memoriam vexatae sunt. In Pakistania incolae atque terrae etiam gravius afflicti sunt quam motu terrae illo maximo, quod ante quinque annos accidit. In Russia hac aestate incendia saeviunt perniciosissima omnium, quibus haec civitas umquam perculsa est.

Labor vere Herculeus

In Graecia primum ministri publici dinumerantur. Adhuc enim ignotum est, quanti Graeci pro re publica munere fungantur. Inter alias causas imprimis multitudo ministrorum publicorum efficit, ut Graeciam pecuniae deficiant; qua de causa res publica Graecorum paene decoxit.

Mafia valde afflicta

Custodes publici Italiae plus quam trecentos socios ´Ndrangheta hetaeriae comprehenderunt. Quae hetaeria est princeps societatum sceleratorum in Europa. Inter captivos est et Domenico Oppedisano, qui octoginta annos natus illi hetaeriae Calabrensi praefuit.

Cantor revertitur

Robbie Williams cantor ad gregem musicum "Take That" i. e. "Hoc Accipe" revertitur. Ante quindecim annos ille cantor, qui a multis adulescentibus permultisque virginibus amatur, illum gregem puerorum longe lateque celebratum reliquerat. Nunc etiam in animo habet denuo cum sociis pristinis circumcurrere.

In Anglia thesaurus Romanus detectus

Thesaurorum investigator Britannus in agro quodam detexit magnam copiam nummorum Romanorum. Quorum plus quinquaginta milia continebantur vase figlino unum pedem sub terra abdito. In his sunt nummi Carausi imperatoris, qui per aliquot annos in Britannia rerum potitus erat. Londinii in Museo Britannico nummi exhibentur.

figlinus – aus Ton – clay

Africa Meridiana Olympia exspectat 

Postquam certamina pedifollica mundana finita sunt, moderatores Africae Meridianae petitionem Olympiorum, quae aestate anni bis millesimi vicesimi habebuntur, mente agitant. Quae certamina aut in urbe Kapstadt aut in urbe Durban haberi possint. Adhuc Olympia non fuerunt in Africa.

Özil nunc Madritensis

Mesut Özil ille dispositor Werderanorum Bremam reliquit. In futurum in urbe Madrito pro societate pedifollica Real ludet. Özil in Germania e parentibus Turcis natus lusor manus Germaniae est. Mutatione perfecta societas Bremensis magnam copiam pecuniae accepit.

In Francogallia velatio vetita

Gerere burkam, id est velamen corporis capitisque, postquam in Belgia vetitum est, in Francogallia quoque diutius non licebit. Parlamentum enim plurimis legatorum suffragantibus legem tulit, qua talis velatio in publico vetaretur. Quae lex autem non valebit, nisi a senatu quoque probata erit.  

In Catalonia tauromachiarum finis

Parlamentum Cataloniae decrevit tauromachias esse abolendas. Quae regio Hispaniae continentalis prima hanc consuetudinem multorum saeculorum immutat. Abolitio post duos annos rata fiet.                  

Notabilia: Apostolorum imagines antiquissimae

Nuper Romae in catacumbis Sanctae Theclae picturae apostolorum Petri, Pauli, Andreae, Iohannis Apostolorum detectae et instrumento laserico speciali patefactae sunt. Quae picturae saeculi quarti exeuntis antiquissimae horum sanctorum imagines esse videntur adhuc notae.

Plura sub

Älteste Aposteldarstellungen entdeckt
Kirchengeschichte bei Vatican-History

Weitere Informationen

Nuntii Latini mensium Iulii et Augusti, [4:23]
Lateinischer Monatsrückblick Juli und August 2010
Deutsche Übersetzung