1. September 2009, 8:00 Uhr

Latein

Nuntii Latini mensis Iulii et Augusti 2009

Recitator: Volker Lütjens

Insidiae in insula Baleari factae

Duo custodes publici Palmanovae, quod oppidum in insula Baleari maiore situm est, insidiis vitam amiserunt. Qua re tota insula, qua probatior Germanis ferias agentibus est nulla, ab omni commeatu et aeroplanorum et navium interclusa est. Basci separationis studiosi eas insidias comparavisse putantur.

Navis Germanica redempta

Per quattuor menses nautae navis Hansa Stavanger in manibus piratarum Somalicorum fuerunt. Pretio redempti et navis et nautae e captivitate emissi sunt. Navicularii Germani postulant, ut navibus onerariis per sinum Arabicum iter facientibus plus praesidii praebeatur.

Porsche a Wolfsburgensibus redemptum

Postquam diu inter principes fabricarum autocinetorum Volkswagen et Porsche de summo imperio pugnatum est, Wolfsburgenses illos fabricatores autocinetorum celerium sibi adiunxerunt. Antea Wendelin Wiedeking princeps fabricae Porsche societatem Volkswagen longe maiorem in potestatem suam redigere conatus erat. Wiedeking dimissus tanta pecunia quanta in Germania adhuc nemo donatus est.

Congressus antiquitatis mundanus

Sexto quoque anno homines antiquitatis peritissimi ex toto orbe terrarum conveniunt, ut inter se de investigationibus suis certiores faciant, quae ad tempora antiqua vel eorum effectus in nostra ipsorum tempora spectent. Hoc anno Berolinum convenerunt Frank Walter Steinmeier ab exteris ministro patrono. Qui fuit secundus talis congressus in Germania habitus. Plus quam quadringenta colloquia et auditiones habita sunt.

Habemus papam

Kalendis Augustis munus gubernatoris radiophoniae Bremensis iniit Jan Metzger diurnarius. Successit Heinz Glässgen gubernatori, qui hoc munere rite se abdicavit, ut otio frueretur. Antea Metzger praefuerat gregi redactorum, qui edunt nuntios diurnos stationis televisificae Germaniae secundae ZDF "heute journal".

Brema latrans

Brema urbs per biduum a nutritoribus canum e toto orbe terrarum profectis quasi locus religiosus facta est, quo qui canibus gauderent, migraverunt. Hac in expositione quadrupedes latrantes ex habitu et docilitate iudicati sunt. Et qui usque ad hunc diem cane carens vitam vixerat, discere potuit, quod canum genus sibi congrueret.

Schumi non reveniet

Michael Schumacher non auriga ad certamina classis Formula Unum reveniet. Hic, qui septies iam campionatum mundanum erat assecutus, dixit se cervice laeso impediri, ne certaminibus talibus interesse posset. Pro Felipe Massa, socio pristino calamitate quadam graviter afflicto, tribus annis intermissis ad autocinetodromum redire voluerat.

autocinetodromus – Rennpiste – race course

Reliquiae maximi momenti

Per duo milia fere annorum in dubio erat, utrum Romae in sepulchro Pauli quod dicitur revera inessent ossa apostoli. Quorum reliquiis ab Ecclesia Catholica nuper inquisitis Benedictus XVI. papa anno Pauli memorali extremo pro certo declaravit illius viri sancti ossa sepulchro inesse.

Vespasiani domus natalis

Archaeologi domum natalem imperatoris Vespasiani detexisse videntur, quae erat Falacrinis, cui oppido a Roma ad aquilonem sito nunc Cittareale nomen est. Illo ab anno undeseptuagesimo usque ad undeoctogesimum imperitante inter alia amphitheatrum Flavium  - postea Colosseum nominatum - est exstructum.

Notabilia

Artificia ad Varianam cladem pertinentia

Viginti artifices ex toto orbe terrarum orti artificia ad cladem Varianam pertinentia creaverunt, quo effectum est spectaculum quoddam insigne. Haec enim artificum opera per illius pugnae regionem in horreis vel agris, in foris vel villis rusticis exhibentur. Jan Hoet curatori illam cladem mythicis figmentis exui est cordi. Plura invenies sub:

Nuntii Latini mensis Iulii et Augusti, [5:54]
Lateinnachrichten Juli und August 2009
Deutsche Version der Lateinnachrichten

Kindernachrichten

Auctores

Gy 7 der Johann-Gutenberg-Schule in Bremerhaven
Frank Schirmer
Hannelore Zöllner

Romani tempestate pulsi

Alina Albrecht

Ludi Romani in colonia Ulpia Traiana editi hoc anno vi tempestatis magna ante tempus finiti sunt. Hora circiter octava fulgura decidebant de caelo, tonitrusque tonabant et pluviae magnae se effundebant. Lacernatus tamen totus madidus eras atque permadefactus. Caelum ita obscurum erat, ut manus ipsas videre non posses.

Tum malum accidisse necesse erat. Nam undique audiebas arceras, helicopterum, vigiles. Megaphonio spectatores iussi sunt castra statim relinquere. Ludi renuntiati sunt.

Tredecim homines graviter vulnerati sunt, ut postea audivimus. Sub arboribus, in quas fulmen icit, se tutos esse putaverunt.

Recitatrix: Alina Albrecht

Romani tempestate pulsi, [1:02]