1. März 2012, 8:00 Uhr

Latein

Nuntii Latini mensis Februarii 2012

Lateinischer Monatsrückblick

Gauck praesidens futurus

Joachim Gauck

Christian Wulff vicesimo mense munere praesidentis Germaniae se abdicavit. Ei succedet Joachim Gauck ille propugnator iurum civilium et theologus, qui factionum regentium et adversantium candidatus communis est excepta Sinistra. Duobus annis ante ille tertio suffragio a Wulff competitore superatus erat.

Ruinae fortunarum Graeciae aversae

Iterum iam Graecia defensa est, ne decoqueret. Ministri Europae rerum fiscalium nova consilia eius civitatis servandae constituerunt et novas pecunias crediderunt. Praeterea multi creditores de nominibus exigendis decesserunt.

Recordatio advenarum a terroristis occisorum

Tota Germania die vicesimo tertio mensis Februarii omnia intermissa sunt per unius minuti silentium, quod monumento esset hominibus illis, qui insidiis terroristarum dextrorum trucidati erant. Berolini in conventu recordationi eorum dedicato Angela Merkel cancellaria veniam propinquorum petivit; promisit omnia, quae ad has caedes pertinerent, patefactum iri. Advenas occisos Germaniae dedecori esse.

Cardinales novi

Benedictus Sextus Decimus papa Romae viginti duo clericos cardinales declaravit, in his Karl Josef Becker et Rainer Maria Woelki Germanos; uterque ex urbe Colonia ortus est. Woelki ante sex menses archiepiscopus Berolini factus erat; quinquaginta quinque annos natus omnium cardinalium orbis terrarum minimus natu est.

In urbem New York profecta

In urbe Bremerhaven multi homines cum spectaculo pyrotechnico vale dixerunt navi circumvectoriae nomine Disney Fantasy. Haec navis, quae in oppido Papenburg constructa, in Bremerhaven instructa erat, nunc cursum New York in urbem Americanam habet, ubi maria circumvehi incipiet.

Vox Americana

Whitney Houston cantrix et actrix Americana duodequinquaginta annos nata decessit. Quae iam per multos annos vinolentiae dedita erat. Habebatur inter praestantissimas cantrices suae aetatis et ubique terrarum laudibus celebrabatur.

Otto rex revertit

Post undecim annos Otto Rehhagel in Ligam Foederalem revertit. Qui exercitator septuaginta tres annos natus usque ad mensem Maium exeuntem manui pedifollicae Hertha BSC praeerit. Per quattuordecim annos manum pedifollicam Werder Bremen exercebat, praeterea pedilusores Graeciae ad campionatum Europaeum duxit.

Colonia in lucem prolata

Colonia, quae a Romanis in Thracia in litore Ponti collocata erat, ab undis procella excitatis detecta est. Arca quaedam, fictilia, animalium ossa inventa sunt. Adhuc ignotum erat illo loco coloniam Romanam sitam fuisse.

Notabilia: Asterix et Galli

Quis est, qui nesciat illum virum pugnandi peritissimum vel socios eius fortissimos, qui ex calamis René Goscinny et Albert Uderzo artificum prodierunt? In oppido Völklingen in aula officinae ferrariae pristinae usque ad mensem Aprilem ineuntem plus centum horum picturae exhibentur cum rebus effossis, quae ad Celtas et Romanos temporis Caesariani pertinent. Praeterea demonstratur, quales res memoriales vel ludi computatrales ab illis fabulis a Goscinny et Uderzo compositis deducti sint.

Plura invenies in interrete sub

Asterix und die Kelten

Weitere Informationen:

Nunitii Latini mensis Februrarii 2012, [4:22]
Lateinischer Monatsrückblick Februar 2012
Deutsche Übersetzung