1. Februar 2012, 8:00 Uhr

Latein

Nuntii Latini mensis Ianuarii 2012

Lateinischer Monatsrückblick

Naufragium horribile in Italia

Das auf Grund gelaufene Kreuzfahrtschiff Costa Concordia.

E Costa Concordia nave circumvectante prope Igelium insulam Italiae saxis impacta septendecim corpora deprompta sunt, in his quinque Germanorum. Cui navi plus quattuor milia hominum inerant, quorum quindecim adhuc reperti non sunt. Nauarcho, cui crimini datur auctorem fuisse huius calamitatis, interdictum est domicilium relinquere.

Facinus infandum

Quattuor milites Americani in Helmand provincia Afganistaniae infandum nefas commiserunt in corpora Talibanorum occisorum. Quod facinus per interrete palam factum ubique terrarum summa cum indignatione exceptum est. Moderatores Civitatum Unitarum Americae moniti sunt, ut et in eos, qui id commiserunt, et in eos, qui illis praesunt, animadverteretur severe.

Navis longa oppugnata

Obscura iam luce piratae Somalici per errorem navem longam aggressi sunt. Praedones in navem iam transcendebant, cum milites, qui numero multo validiores erant, tela in eos coniecerunt. Sex piratae comprehensi sunt, septimus autem nave excussus ex aqua non emersit.

Parlamentarii observantur

Dimidia fere pars legatorum factionis Sinistrorum a custodibus rei publicae tuendae observatur. Qua de re questi sunt Sinistri dicentes talem observationem factionis adversantis alienam esse a re publica bene constituta. At minister rerum internarum iure id fieri affirmavit.

Vectigalia affluentia

Res publica Germanica mense Decembri plus pecuniae cepit quam umquam antea mense uno. Quod quidem apparet e tabulis fiscalibus novissime editis. Pensionum quoque aerarium annis praeteritis numquam tam bene completum erat pecunia.

Caedes in iudicio

In Bavaria dum iudex iudicium pronuntiat, accusatorem publicum interfecit reus, qui arma attulerat inobservata. Quo facto, ut aedes forenses maiore diligentia observarentur custodirenturque, petitum est.

Navigare necesse est

Laura Dekka ex Nederlandia orta sola orbem terrarum circumvecta est. Qua nemo umquam minore aetate id adhuc perfecit. Haec virgo sedecim annorum plus quingentos dies navigium suum duobus malis instructum per maria gubernavit. E Nederlandia profecta primum Oceanum Atlanticum percurrit. Postea Africam et Australiam praetervecta usque ad insulas Caribicas pervenit.

Novum sauriorum genus

Palaeontologi Brunsvigienses reliquias Ichtyosauri nuper effossi publice proposuerunt. Hoc exemplar, cuius genus adhuc non erat descriptum, trium metrorum erat; ei erat rostrum tenue dentium acutorum plenum.

Notabilia: Cassis Romana aetatis imperatoris Claudii

Londinii in Museo Britannico cassis magnifice ornata publice ostenta est, quae ante decem annos detecta erat. Fabricata erat tempore fere imperatoris Claudii, quo Romani in Britanniam invaserunt. Sunt, qui opinentur fuisse decurionis Britanni, qui in equitatu Romana stipendia fecit. Cur cassis haec paulo post cum thesauro nummorum permagno sub terra condita sit, non satis liquet. Et cassis et nummi a mense Ianuario exeunte in museo oppidi Harborough in comitatu Leicestriensi siti exhibentur.

Plura in interrete sub

Römischer Prunkhelm wird ausgestellt

Weitere Informationen:

Nuntii Latini mensis Ianuarii 2012, [4:36]
Lateinischer Monatsrückblick Januar 2012
Deutsche Übersetzung