31. Januar 2011, 8:00 Uhr

Latein

Nuntii Latini mensis Ianuarii 2011

Lateinischer Monatsrückblick

Rebellio pauperum

Ben Ali Tunesiae praesidens, postquam per aliquot septimanas iniuriis reclamatum est, munere se abdicavit. Post dominationem viginti trium annorum in exilium secessit. Praecipue iuvenes vias frequentaverant reclamantes magnis pretiis et libertatibus non concessis.

Christiani crudeliter occisi

Impetu terroristico in ecclesiam Christianorum Aegyptiorum Alexandriae facto viginti tres homines necati sunt. Quod scelus ab islamismi sectatoribus commissum est. In terris, in quibus religio Mahometana praevalet, novissime saepius saepiusque scelera in Christianos facta sunt.

Graeci limitem volunt

Moderatores Graeciae consilium ceperunt finem inter Graeciam et Turciam muniendi, ut homines non legitime in Graeciam transire conantes ab hoc conatu deterrerentur. Quod consilium a Turcis vehementer vituperatum est.

Vale carissime

Arnold Schwarzenegger, postquam rem publicam Californiae iterum moderatus est, magistratu abiit. Schwarzenegger, qui ex Austria ortus multis in pelliculis actor excellebat, ante septem annos ad rem publicam accesserat Republicanis favens. Cui successit Jerry Brown Democrata.

Impunitas negata

Summum Italiae iudicium legem dubiam sustulit, qua prohibebatur, ne ii, qui in re publica moderanda occupati sunt, in ius vocarentur. Quo facto duae actiones intermissae, quibus in Silvio Berlusconi ministrorum praesidentem animadversum est propter corruptionem et  vectigalia non pensa, renovari possunt.

Undique imbres atrocissimi

Australiae regio aquilonia inundatione maxima vexata est. Imbribus assiduis tanta area quanta Francogallia et Germania inundata est.

In Brasilia imbribus atrocissimis et terrarum labe plus quam septingenti homines vitam amiserunt.

Seditio in nave Gorch Fock

Die Gorch Fock

Cum discipula militaris in nave Gorch Fock casu vitam amisisset, fama est nautas fecisse seditionem. Illa mortua tirones navis exercitatoriae alii ad vela ascendere, alii omnino illa nave vehi recusaverunt. Quibus factis praefectus navis a Karl-Theodor zu Guttenberg Germaniae ministro defensionis revocatus est.

Ultimum militia obligatoria suscipienda

In Germania per plus quam quinquaginta annos iuvenibus militia sequenda erat. Quod nunc ultimum factum est. In futurum non nisi voluntarii militabunt. A mense Iulio militia obligatoria intermittetur.

Notabilia: Ars Etruscorum

Hannoverae in museo de August Kestner vocato usque ad finem mensis Februarii  expositio spectari potest, in qua multa artificia Etrusca praestantia ab illo viro claro collecta exhibentur. Simul proponitur, quid  viri docti a temporibus illius Johann Joachim Winckelmann de arte eius nationis cogitaverint.

Plura invenies sub:

Ausstellung im August Kestner Museum 25.11.2010 - 27.2.2011
Die Etrusker - Die Entdeckung ihrer Kunst seit Winckelmann

Weitere Informationen

Nuntii Latini mensis Ianuarii, [4:21]
Lateinischer Monatsrückblick Januar 2011
Deutsche Fassung