1. Februar 2010, 8:00 Uhr

Latein

Nuntii Latini mensis Ianuarii 2010

Lateinischer Monatsrückblick

Recitator: Volker Lütjens

Haitia motu terrae vastata

Motu terrae, quo gravior per ducentos quinquaginta fere annos non fuit, Haitia insula Caribica gravissima calamitate affecta est. Timetur, ne ducenta milia hominum vitam amiserint. Quo motu una ex pauperrimis totius orbis terrarum civitas conquassata est

In Chilia tempora mutata

Suffragio decretorio Sebastián Piñera praesidens Chiliensis electus est. Quo facto primum post dominationem Pinochet ante viginti annos eversam politicus dextrarum partium ad gubernacula civitatis sedet. Piñera succedit Michelle Bachelet Socialistae.

Attemptator liberatus

Ali Agca, qui olim Ioannem Paulum II. papam necare temptaverat, post triginta annos e carcere emissus est. Papa, dum in campo Petri hominibus potestatem sui dat, ab illo tam graviter vulneratus erat, ut in periculo mortis fuerit

Turris Babylonia

In urbe Dubai inauguratum est opus octingentorum duodetringinta metrorum, quo nullum altius est in orbe terrarum. Cuius turris forma ab architectis aloes figuram imitando ficta est. Est nominata nomine Burj Chalifa de phylarcho gentis vicinae. Uwe Hinrichs ingeniarius Bremensis operibus faciundis praeerat.

Urbs Bremerhaven amplificata

Civitas confoederata Bremen, cui adiuncta est urbs Bremerhaven, de Saxonia Inferiore civitate vicina illum campum Luneplate emit viginti quinque milionibus Euronum. Emptione facta territorium urbis maritimae augebitur quinta parte. Haec loca emere necesse erat portus amplificandi causa.

Pecuniae inter epulas donatae

Inter epulas sollemnes, quae Bremae cum sponsione glaciali sunt coniunctae, pecuniae tantae collectae sunt pro societate naufragorum servandorum quantae numquam antea. Plus quam septingenti homines in rebus politicis vel oeconomicis excellentes vocati erant. Conviva honorarius interfuit Karl-Theodor zu Guttenberg minister a defensione, cuius factio est Unio Christiana et Socialis.

Werder in primis

Hoc tempore manus pedifollica Werder Bremen iterum atque iterum vincitur, sed tamen Werderani in numero optimarum manuum Europae sunt. Nam censu horum quinque annorum habito locum nonum obtinent. E societatibus pedifollicis Ligae Foederalis nulla manus nisi Bavarica, quae locum octavum obtinet, ante Bremenses est.

Nuntii Latini abhinc septimanales

Nuntii Latini radiophoniae Bremensis abhinc a statione Deutschlandradio per Europam emittentur. Octavo quoque die nuntii rerum novissime per orbem terrarum vel Germaniam gestarum in programmate novo D-Radio Wissen vocato audiri poterunt.
Quae autem adhuc singulis mensibus praesentari solebant, in futurum quoque praebebuntur.

Notabilia: Mercurius sociique

Inter deos, qui a Celtis maxime colebantur, certe fuit ille, qui Latine Mercurius vocabatur. Cuius dei signaculum, quod proximo anno est effossum, inter alios deos, quos tempore Romano Helvetii domi venerabantur, expositum est usque ad mensem Iunium Tugii in museo. Accedunt quidam commentarii de sacris tum factis et de eis, quae homines a deis speraverint.

Plura invenies in interrete sub:

Homepage des Museums für Urgeschiche(n)
Vernissage der aktuellen Sonderausstellung

Weitere Informationen

Nuntii Latini mensis Ianuarii, [4:51]
Lateinischer Monatsrückblick Januar 2010
Deutsche Übersetzung