1. Januar 2011, 8:00 Uhr

Latein

Nuntii Latini mensis Decembris 2010

Lateinischer Monatsrückblick

Spes clima mundi deterius evitandi

Inter summarum auctoritatum Unitarum Nationum congressionem, quae Cancún in urbe Mexicana est habita, compromissum est de calefactione atmosphaerae minuenda. Cunctae civitates praeter Boliviam constituerunt silvas pluviales melius tutandas esse. Civitatibus egentioribus auxiliandum esse, ut climati depravando obsistere possent.

Berlusconi triumphat

Silvio Berlusconi

Silvio Berlusconi praeses ministrorum Italiae non cecidit. Vix aegreque suffragium de diffidentia legatorum superavit. Qua de causa Romae tumultus graves inter adversarios eius et custodes publicos orti sunt.

Electionum eventus corruptus

Alexander Lukaschenko, qui Bielorussiam per sedecim annos regnavit, electionibus habitis denuo praesidens creatus est. Hominibus autem, qui eas res sine ira et studio observaverant, perusasum est illas electiones non sine fraude esse factas. Alexander Lukaschenko rex vel dominus postremus in Europa esse existimatur

Populi scitum in Helvetia factum

Helvetii populi scito ius advenarum mutandum esse constituerunt. Ex quo homines alienarum terrarum, qui scelera commiserunt, hac ipsa causa e civitate exire cogentur. Quod suffragium Factio Popularis Helvetica postulaverat.

Militia obligatoria intermissa

Democratae Christiani et Liberales, qui sunt coalitione iuncti, decreverunt, ut militia obligatoria inde a Kalendis Iuliis intermitteretur. Eodem tempore militum numerus diminuetur. Voluntariis autem in futurum quoque licebit militiam capessere.

Factio Liberalis in discrimen vocata

Wolfgang Kubicki, qui in Parlamento Slesvigae-Holsatiae Liberalibus praeest, censet factioni suae imminere, ut dissolvatur. Guido Westerwelle praesidi factionis suadet, ut munere se abdicet. Ex interrogationibus enim publicis apparet gratiam Liberalium apud homines per aliquot iam menses minui.

Danus Flensburgo praeest

Novus civium Flensburgensium magister superior est Simon Faber. Quo facto post triginta fere annos denuo vir e factione Danorum SSW hoc oppidum regit. Flensburgi, quod ad magnam saeculi duodevicesimi partem ad regnum Daniae pertinebat, multi cives natione Danica sunt.

Omnia vincunt nix glaciesque

Tempestas hiberna multis in locis Europae impedit, ne itinera confici possint. In Germania multi consistere coacti sunt. Peregrinantes in aliquot aeriportibus condiciones malas aegre ferentes tumultus excitaverunt.

Notabilia: Statua Traiani equestris detecta

In regione septentrionali urbis Francofurti et fragmenta statuae imperatoris Traiani equestris et nummi Romani detecti sunt. Quorum recentissimus anno ducentesimo sexagesimo est signatus. Eo tempore Germani imperium Romanum invadentes illam statuam equestrem deleverunt.
Usque ad mensem Ianuarium medium illa, quae ibi inventa sunt, Francofurti exhibentur.

Plura in interrete sub:

Archäologisches Museum Frankfurt
Neufund einer römischen Reiterstatue

Weitere Informationen

Nuntii Latini Mensis Decembris 2010, [4:30]
Lateinischer Monatsrückblick Dezember 2010
Deutsche Übersetzung

Nos redactores exoptamus, ut nostris lectoribus hic annus sit bonus, faustus, felix fortunatusque.