1. November 2011, 8:00 Uhr

Latein

Nuntii Latini mensis Octobris 2011

Lateinischer Monatsrückblick

Tyrannus occisus

Muammar al-Gaddafi

Muammar al-Gaddafi dominator Libyae pristinus, cum captus esset, telis occisus est. Quo modo id factum sit, non satis liquet. In multis terrae Libyae oppidis homines celebraverunt dominationem eius finitam esse, qua per quadraginta duo annos oppressi tenebantur.

Indignatio iudicio commota

In Ucraina Julia Timoschenko custodia septem annorum multata est, quia munere praesidentis ministrorum abusa esset. Quae in iudicium vocata erat, quod saluti populi nocens foedus cum Confoederatione Russica inisset. Non modo moderatores civitatum occidentalium, sed etiam Vladimir Putin indignantes iudicium improbaverunt.

Gilad Schalit dimissus

Gilad Schalit miles Israelianus, qui per quinque annos ab Hamas grege Islamistorum obses custodia tenebatur, dimissus est. Cuius missio ut perficeretur, Israelianis vicissim mille Palaestinenses e carceribus emittendi erant. Schalit intra fines Israelianorum ex insidiis captus et ablatus erat.

Tusk electus iterum

Primum post regimen communistarum eversum in Polonia moderatoribus civitatis contigit, ut iterum eligerentur. Factio Donald Tusk ministrorum praesidentis electionibus habitis maiorem partem sedium parlamenti assecuta est. Jaroslaw Kaczynski factionis adversantis dux victus in suffragiorum certamine Angela Merkel Germaniae cancellariam insimulaverat Poloniam in dicionem suam redigere velle.

Nex machinata sollicitudines movet

Moderatores Civitatum Unitarum Americae eos, qui Iraniam regunt, incusaverunt necem paravisse legato Arabiae Saudicae Washingtoniano. Qua re odium harum nationum mutuum magis exarsit. Moderatores Iraniae contra dixerunt illud crimen esse ridiculum.

Res cuiusdam infamiae finita

Liam Fox defensionis minister Britanniae magistratu se abdicavit. Cui crimini datum erat commoda privata cum officiis publicis coniunxisse. In itineribus, quae sibi muneris fungendi causa facienda erant, socium secum duxerat familiarem; cuius viaticum datum esse dicitur a viris commoda sua spectantibus.

Vettel iterum campio mundanus

Sebastian Vettel viginti quattuor annos natus iterum campio mundanus certaminis autocinetorum Formulae Unius factus est. Id adhuc contigit nulli cursori aetate illius. Ad quod ei suffecit iam ante omnia certamina finita tertius locus, quem in curriculo in oppido Suzuka sito adeptus est. 

Danedream equus omnium celerrimus

Cursu equestri Prix de l’Arc de Triomphe nominato, qui quotannis Lutetiae in urbe habetur, Danedream equa trium annorum facile vicit. Quo cursu in orbe terrarum maior est nullus. Adhuc in hoc curriculo nullus equus celerius cucurrit. Danedream fetura in civitate Saxonia Inferiore nata est.

fetura – Zucht – breeding

Avis anni proximi peculiaris

Monedulae declaratae sunt avium species peculiaris anni bis millesimi duodecimi. Quae sunt inter prudentissimas avium vernacularum. Haec species, quod in annos minus locorum idoneorum invenitur, ubi nidificare possit, in angustias adducta est.

Notabilia
Decennium nuntiorum Latinorum Bremensium
Nuntii Latini radiophoniae Bremensis iubilaeum decem annorum agunt. Nam per hoc spatium temporis Bremae quoquo mense nuntii eduntur Latine conscripti, qui ad urbem ipsam, ad Germaniam, ad orbem terrarum pertinent. His nuntiis, quod tanto studio expetuntur, redactores per duo fere annos septimanales insuper addunt. Praeterea Latine offeruntur liberorum nuntii, pelliculae parvulae , librorum annuntiationes. Quibus omnibus rebus interretialiter per totum orbem terrarum divulgatis in multis terris fautores amatoresque sunt.

Plura invenies hic in pagina nostra domestica

Nuntii Latini bei Radio Bremen

Weitere Informationen

Nuntii Latini mensis Octobris, [5:51]
Lateinischer Monatsrückblick Oktober 2011
Deutsche Übersetzung

Lectoribus nostris hic novus annus sit bonus faustus, felix fortunatusque