1. November 2012, 8:00 Uhr

Nuntii Latini mensis Octobris 2012

Lateinischer Monatsrückblick

Praemium Nobelianum Unioni Europaeae attributum

Unio Europaea hoc anno praemio Nobeliano pacis ornata est. Quo honore digna habita est, quod multum valuisset ad pacem inter nationes conciliandam atque servandam et ad democratiam disseminandam. Id quidem dicit Osloensis senatus praemiis Nobelianis dandis. Unio Europaea, cui nunc intersunt viginti septem civitates, anno millesimo nongentesimo quinquagesimo primo condita erat impulsu Francogalliae et Germaniae.

Vectigalia affluentia

Fiscus Germaniae hoc anno plus pecuniae accipiet quam umquam antea. Mercaturis enim florentibus aerarium augetur. Moderatores rei publicae vectigalibus affluentibus uti volunt ad aes alienum minuendum.

Aurum reducetur

Gestapelte Goldbarren

Germania, quod ad copiam auri attinet, secundum locum omnium orbis terrarum civitatum obtinet. Maxima autem pars eius cum in aliis terris tum in Civitatibus Unitis Americae asservatur. Quod aurum a summis quaestoribus postulatur, ut transferatur in Germaniam.

Magister civium Stutgardiensium Viridis

Fritz Kuhn Stutgardiae fiet novus magister civium primarius. Qui socius factionis Viridium suffragio decretorio vicit Sebastian Turner candidatum et Democratarum Christianorum et Liberalium et Consociationis Civium Liberae. Kuhn primus Viridis praeerit capiti civitatis Germanicae. Qui magistratus per quadraginta annos obtinebatur a Democratis Christianis.

Aetas ad finem venit

Kurt Beck Rhenaniae-Palatinatus minister primarius annuntiavit se anno exeunte ab omnibus magistratibus recessurum. Consilium est Malu Dreyer ei succedere, quae ipsa est Democrata Socialis. Beck per duodeviginti annos praeerat moderatoribus eius civitatis.

Munitio viarum finita

Strata autocinetica inter urbes Bremam ac Hamburgum tandem expedite uti potes, postquam quattuor annos exaedificata est. Qua re iter inter urbes multo acceleratur. Munitiones viae iterum atque iterum maximo impedimento erant iter facientibus.

Helmut Haller mortuus

Helmut Haller, pristinus ille lusor manus pedifollicae Germaniae, aetate septuaginta trium annorum mortuus est. Haller primus Germanorum in Italia pedilusor anni optimus Ligae supremae electus est. In certamine finali campionatus mundani, qui anno millesimo nongentesimo sexagesimo sexto in Britannia fuit, ei primus ictus contra Britannos contigit; quo in certamine Germani denique duo ad quattuor victi sunt.

Cubicularius damnatus

Paolo Gabriele papae cubicularius pristinus a iudicio Vaticano custodia duodeviginti mensium damnatus est. Qui confessus erat documenta arcana Benedicti Decimi Sexti papae surripuisse et foras dedisse. Pontifex Maximus per praeconem pronuntiavit se damnato veniam daturum.

Notabilia: Alesia restituta

Inter rerum antiquarum peritos constat pugnam, qua Caesar Vercingetorigem devicit, commissam esse Alesiae, cui oppido in Burgundia sito hodie nomen est Alise-Sainte-Reine. Militibus Gallicis tum decem legiones Romanae oppugnaverant. Vercingetorix a Caesaris copiis victus captivus Romam deductus atque supplicio affectus est. In loco pugnae museum exstructum est, quo tempora Caesariana reviviscerent. Etiam pars castrorum Romanorum reaedificata est. Non solum haec, sed circumvallationes quoque restitutae spectari possunt.

Plura de his invenies in interrete sub

Museum Alesia Park
Museum Alesia Park - Die Vercingetorix-Statue

Nuntios recitat: Volker Lütjens

Weitere Informationen:

Nuntii Latini mensis Octobris 2012, [4:52]
Lateinischer Monatsrückblick Oktober 2012
Deutsche Fassung