1. Oktober 2012, 8:00 Uhr

Nuntii Latini mensis Septembris 2012

Lateinischer Monatsrückblick

Ad caedes evocatur

Quelle: DPA

Moslems protestieren gegen das Anti-Islam-Video mit Bannern und der Verbrennung der US-amerikanischen Flagge

Extremistae islamici hortati sunt ad caedes in Germania faciendas. Actis diurnis nuntiatur islamistam quendam ad necem evocavisse pelliculae ulciscendae causa, qua Mohammed prophetae malediceretur. Illa pellicula Americana per orbem terrarum iram indignationemque muslimorum inflammavit.

Cuius insulae?

Moderatoribus Sinarum et Iaponiae magna est controversia de insulis quibusdam in mari Sinensi orientali sitis. Quas insulas incolis carentes utraque civitas sibi vindicat. Eam regionem piscibus uberiorem esse certum est. Praeterea suspicio est ibi petroleum suppetere.

Suspicio corruptionis

Evangelos Meimarakis praesidens parlamenti Graeciae, cui crimini datur corrupte egisse, munus intermittit. Nuntiatum est magistratus exquirere, num vectigalium fugax fuisset. Non solum Meimarakis, sed etiam alios socios factionis conservativae corruptos esse suspicio est.

Electiones Belorussicae

Ex electionibus in Belorussia habitis Alexander Lukaschenko dominator exiit victor. Factiones autem adversantes negant electiones democratice habitas esse. Moderatores quoque Germaniae dicunt non fuisse potestatem parlamenti libere eligendi.

Universi socii decernent

Virides volunt sententiam cuiusque socii factionis rogare, qui in parlamento Germaniae eligendo duo candidati primarii sint. In conventu minore legatorum factionis convenit de hoc eligendi modo. Cuius eventus mense Novembri publicatum iri exspectatur. Adhuc duodecim candidati sunt, qui alterum honorem petunt.

Aditus orbis terrarum novus

In oppido Wilhelmshaven portus Jade-Weser apertus est. De modo ac ratione aedificandi sedecim annos cogitatum est, aedificatum est quattuor. Ille portus Germanorum primus est, in quo non refert, sitne aestuum accessus an recessus. Cuius dominae sunt civitates Brema et Saxonia Inferior.

Quaestio in dubium vocata

In Francogallia per duo annos ratti sunt alti maizio, cuius genoma mutatum erat. Quo facto detectum est in his animalibus et tumores ortos esse et iecora renesque damnis gravibus affectos esse. Haec vera esse negantur ab iis, qui genomatibus arte mutandis favent.

Amor pedifollicus

Henry Kissinger pristinus ille minister ab exteris Civitatum Unitarum Americae in Germaniam patriam profectus est nulla alia causa nisi ut spectaret ludum pedifollicum societatis Greuther Fürth. Amor huius societatis pedifollicae manebat, cum familia eius Iudaica a Socialistis Nationalibus in Civitates Unitas Americae fugisset. Manus illa Furthensis, quae seni undenonaginta annorum maxime cordi est, hoc anno in Ligam Foederalem ascenderat.

Papyrus memoratu digna

Karen King historica Americana textum quarto saeculo post Christum natum scriptum repperit,  ex quo concludi potest Iesum Christum uxorem duxisse. Mulier docta documentum putat neque falsatum neque corruptum. Quod erit demonstrandum.

Notabilia: Iter in tempus imperii Romani

Anno quinto decimo post Christum natum legiones Helvetiam in potestatem imperii Romani redegerunt. Loco opportuno Vindonissae castra legionis exstruxerunt unica, praeter quae in Helvetia fuerunt nulla. Prope Windisch vicum hodiernum nunc visitatoribus est facultas itineris in tempus Romanorum faciendi. Iis, qui velint, licet deverti in tuguriis legionariorum reaedificatis et experiri, qualem vitam egerint.

Plura de his invenies in interrete sub

Homepage Legionärspfad Vindonissa
Der Römer-Erlebnispark in Windisch

Nuntios recitat: Dr. Heinrich Fliedner

Weitere Informationen:

Nuntii Latini mensis Septembris, [4:54]
Lateinischer Monatsrückblick September 2012
Deutsche Fassung