1. April 2010, 8:00 Uhr

Latein

Nuntii Latini mensis Martii 2010

Lateinischer Monatsrückblick

Recitatrix: Hannelore Zöllner

Victoria praesidentis maximi momenti

In Civitatibus Americae Unitis reformatio curae sanitatis ratum facta est illa lege a Barack Obama praesidente  subsignata. Qui quidem sententiis in parlamento controverse latis non facile vicerat.

Ministrorum collegium commutatum
Electionibus regionalibus in Francogallia habitis factio conservativa Nicolas Sarkozy praesidentis gravissima clade affecta est. Quo facto ille tres ministros commutavit. In omnibus regionibus Socialistae victoriam consecuti sunt excepta una Alsatia.

Graecis parsimonia adhibenda est

Moderatores Graeciae, ut naufragium a patria  averterent, sibi rigidam parsimoniam adhibendam esse censuerunt. Pensiones et salaria minuta sunt. Itaque Athenis non solum gubernatoribus rei publicae reclamatum est, sed etiam in viis vis adhibita est.

Chilia motu terrae affecta
Motu terrae Chilia percussa est. Ad mille homines interfecti sunt, aliquot milia tectis privati. Permulta aedificia pontesque totam per Chiliam corruerunt.

Liberi violati

In compluribus scholis ecclesiae catholicae internis aliisque liberos turpiter violatos esse patefactum est. Litteris episcopalibus Benedictus papa delicta sacerdotum graviter condemnavit. Etiam in aliis institutionibus liberos violatos esse  interim cognitum est.

Poeni infantes immolabant

Poeni Romanis inimicissimi ritus crudeles exercuisse dicuntur. Eos enim infantes immolavisse, ut animum dei summi placarent, communis opinio est. Vir doctus Americanus, qui ea de re scrutatur, memoriam a scriptoribus rerum Romanis proditam falsam et corruptam esse contendit. Romanos Carthaginiensium famam maligne laesisse.

Tertia hominum species detecta?

Tertia species hominum adhuc ignota praeter neanderthalenses et sapientes ante triginta milia annorum in Sibiria exstitisse videtur. Id quidem homines docti instituti Max Planck Lipsiensis colligunt e genomate mitochondriali, quod e digito humano in montibus Altai effosso extraxerunt; quod quidem a genomate et sapientium et neanderthalensium adeo differt, ut proavos communes ante milionem annorum vixisse constet.

Weitere Informationen

Nuntii Latini mensis martii 2010, [3:50]
Lateinischer Monatsrückblick März 2010
Deutsche Übersetzung