Hic laborat admirabili arte Louis Daniel Ramires puer quindecim annorum. Parietem scholae Bremerhavensis imagine exornat. Simul discipulos eius scholae in artem pingendi introducit. Antea, inquit, puer malus fui; me scelestum esse dixerunt. Nam muros domorum in urbe Monterey, in qua vivo, inquinavi. Iterum atque iterum orabam, ut mihi liceret in muris pingere. Tandem licentiam assecutus est et – imagines vere magnas et magnificas pinxit.Nunc artifex spectatus est. Magistra linguae Hispanicae – et ipsa Mexicana – eum invitavit, ut per unam septimanam cum discipulis suis scholam exornaret. Quindecim annos natus et talis artifex! Liberi pleni admirationis sunt. Urbs Bremerhaven puero valde placet, sed – laborandum est; imagines Frieda Kahlo illius Germanae-Mexicanae et Paula Modersohn-Becker, a cuius nomine schola appellata est, perficiendae sunt, priusquam in patriam redit.