Tam densa nebula numquam ante hoc tempus terram intexit et caelum obscuravit. At vide, quam pulcher sit aspectus urbis: Domus, deversorium illud grande, ripa fluminis nebulis quasi fumant. Urbs tranquilla est, viae vacuae ab autocinetis et hominibus; solae luces publicae videri possunt. Sed cui autocineto iter facere necesse est, caveat, ne incommodum accipiat. Emissione radiophonica monetur, ut cautissime progrediatur; non plus quam quinquaginta metra prospici posse. Beatus ille, qui ea tempestate per tantam caliginem incolumis eo pervenit, quo voluit. Et ecce, ea nocte nebulosa accidit, ut in portu Visurgis fluminis duae naves onerariae inter se colliderentur, quarum altera detrimentum accepit: Navis illa in navale trahenda est reparatum.