Ex aere spectamus insulam Juist in mari Germanico sitam. Ad hanc insulam nuper ballaena appulsa est. Sed ubi est? "Si eam videre vis, primum scalis descendas usque ad litus, deinde dextrorsum ibis in directionem Norderney insulae." Via longa et molesta est, unam fere horam pedibus eundum est. Ventus fortis, aditus asperrimus, sed tamen multi spectatores. Tandem videmus ballaenam. Ingenti magnitudine est: Si viveret, certe horrorem nobis excitaret. Sed quid nunc fiet cum ista mole corporis ballaenae? Eam conservare impossibile sit. An hic in litore fovea ingenti facta sepeliatur? Sed fortasse aestu fervente undae eam in mare reportabunt et ad insulam vicinam Norderney appellent.