Plattdeutsche Nachrichten

De Plattdüütschen Nahrichten vun'n 29.11.2012

Tall vun Lüüd ahn Arbeit

Nürnbarg. De Tall vun de Lüüd ahn Arbeit in Düütschland is in Novembermaand licht trüchgahn. Na Informatschoon vun de Buunsagentur för Arbeit in Nürnbarg sünd 2,7 Millionen Minschen ahn Arbeit. Dat is een Quote vun 6,5 Perzent. De Tall vun de Lüüd ahn Arbeit in Bremen is in Novembermaand ok licht trüchgahn. In Neddersassen is de Tall vun de Arbeitslosen 'n beten stegen. In'n Lanne Bremen sünd in November 10,8 Perzent ahn Arbeit wesen. In Neddersassen liggt de Tall vun de Arbeitslosen bi 254-dusend. Dat is een Quote vun 6,3 Perzent.

Woll doch keen Atomschiet-Lager in'n Wendland

Hannober:  De Soltstock in Gorleben in'n Wendland kummt vör den Ministerpräsidenten McAllister vun de CDU as Atomschiet-Endlager nich mehr in Fraag. Atomschiet schöll so lagert weern, dat dat ok wedder trüchhaalt weern könn, het McAllister de Frankfurter Allgemeene Zeitung seggt. Solt weer daför nich to bruken.

Energie kummt in'n Buunsdag op't Tapeet

Berlin:  De Buunsdag well vondaag över'n  heel Energie-Pakeet afstimmen. Dat geiht dorüm, dat dat allgemeene Versorgen met Strom sekerstellt un de Utbo vun Windparks in de Noordsee Fohrt opnimmt. De Buunsregeern well Geld för den Schaden bi de sonömmten Offshore-Windparks op de Verbrukers ümleggen. För een Huushalt könn dat knapp teihn Euro mehr in'n Johr bedüden.

Schoolmester-Personaal-Versammeln in Bremen

Bremen: De Schoolmesters in Bremen föddert mehr Geld. Op een Personaal-Versammeln schall vondaag över de enkelten Pünkt verhannelt weern. Dat geiht to'n Bispill ok darüm, dat bi de Bildung nich wieter spoort ward. Een anner Saak is dat Trüchtreden vun de Bildens-Senatersch  Renate Jürgens-Pieper, SPD.

Startteken för de Wienachtsmarkten in Bremen

Bremen: Üm un bi 250 Buden tööft vun vondaag af an op de Besökers vun de Bremer Wienachtsmarkten. Hüte Namiddag ward dat Startteken geven för de Markten rund üm dat Raathuus un an de Schlachte, de  middelöllerlich smuck maakt worrn is. De Veranstalters rekent bet to'n 23. Dezember met 1,5 Millionen Besökers.

Werder het in de Football-Buunsliga verloren

Bremen:  Werder Bremen het in de Football-Buunsliga dat Speel to Huus gegen Bayer Leverkusen met 1:4 verloren. De Bremer liggt nu op Platz twölf in de Tabell. Hier noch, wat bi de annern Speele bi rutkamen is: Mönchengladbach – Wolfsburg  2:0, Stuttgart – Augsburg  2:1, Nürnbarg – Hoffenheim  4:2 un Freiburg – Bayern-München  0:2

Dat Weer

Un woans süht dat met dat Weer ümto ut? An'n Bremer Flooghaben, an de Fischereehaben-Slüüs Bremerhaben un in Ollnborg hebbt wi opstunns 4 Grad un in Rodenborg 3 Grad. Vondaag is't meist wulkendüster un stedenwies  fallt 'n beten Regen. Von hüte Middag af an ward denn na un na kohler. De Wind weiht met Maten bet frisch ut Noord bet Noodwest. Tokamen Nacht fallt enkelte Snee- oder Grisselschuers, un dat Thermometer sackt bet een Grad ünner null. Op de Straten kann't denn glitschig weern. Morrn wesselt Sünn un Wulken un dat kann ok enkelte Sneeregenschuers geven. Dat Thermometer stiggt bet 3 Grad, un de Wind weiht swack ut de westen bet süd-westen Kant. Sünnavend is't wulkendüster, un dat gifft kräftige Sneeregenschuers bi Temperaturen üm 4 Grad. Sönndag fallt noch enkelte Sneeregen- oder Grisselschuers bi Temperaturen twüschen 1un 3 Grad, snachtes kann't glatt weern. Dat weern de Nahrichten. Ralf Stölting het se tohoopstellt. Op platt trechtmaakt un vörleest het se Marianne Kozlowski.