Plattdeutsche Nachrichten

De Plattdüütschen Nahrichten vun'n 19. Dezember 2012

Plattdüütsch Nahrichten vun'n 19. Dezember 2012, [3:19]

Kabinett will Energie-Paket besluten

Berlin – Dat Bunneskabinett will hüüt wat Wichtiges för den Utstieg ut de Atoms besluten. Darför mutt dat Stroomnett in Dütschland utboot warrn, darmit de Stroom ut Windkraftwarks in Norddütschland wieterleitet warden kann. Dree grode Leitungen sünd plaant. Tohoopnahmen sünd se 2-dusend-800 Kilometer lang. Buterdem will dat Bunneskabinett Huusbesittern mit Geld darbi helpen, de Wänne beter to isoleeren. Bit to 5-dusend Euro will de Regeern darför rutpacken.

Uni Düsseldorp drievt dat Verfahren gegen Schavan wieter voran

Düsseldorp – De Universität Düsseldorp drievt wieter dat Verfahren üm de Doktorarbeit vun Billenministersche Schavan vöran. De Ministerin schall bi annern Afschreven hebben. De Hoochschool vermellt, dat de Promotschons-Kommischon de Doktorarbeit pröövt hett. Dat is woll so, dat de Uni Düsseldorp nu een Verfahren to'n Aferkennen vun'n Doktortitel in Gang bringt. Schavan harr 1980 an de Uni ehr Dissertatschon schrieven. Een vertroolich Gootachten daröver weer in de Medien kamen. Darin ward Schavan vörsmieten, dat se mit Afsicht täuscht hett. Se sülfst seggt, dat stimmt nicht.

Entsorgungsfirma ünner Verdacht

Bremen – De Staatsanwaltschupp ermiddelt woll gegen dree Mitarbeiter vun de Bremer Entsorgungsfirma Nehlsen wegen Untreue. Se schüllt een Konkurrenten ut Oostfreesland uttrickst hebben, schrievt de Weser Kurier. De Bremer Entsorger harr sien Andeele bi Beekmann utnutzt, üm den Oostfreesen Opdrääg aftojagen, dat ward jem vörsmeten. Nehlsen hett an Beekmann aver Sellschoops-Andele un dröff dat darum egens nich daan. Dat güng üm een Utschrieven üm dat Entsorgen vun Altglas un vun de so nömten "Gelen Säcke" in'n Landkreis Aurich. Nehlsen striet allens af.

Nee'e Problems bi'n Deepwaterhaben

Wilhelmshaben – An'n Slepperhaben vun'n Jade Weser Haben is wat kaputt gahn. Blots een paar Maand nah'n Inbedreevnehmen vun den Haben mööt se nu ölben Swimm-Pontons heel maken. Denn bi een paar vun jem is Beton afplatzt. Fief Pontons ward bi de nedderlännische Firma, de dat boot, repareert, de annern direktemang vor Oort. Woso dat passeren kunn un woveel dat Repareren kostet, weet noch nümms.

Obama will Sturmgewehre verbeden

Washington – US-Präsident Obama hett ankünnigt, dat dar wat nahkummt nah dat Massaker an een Grundschool in Newton. As een Spreker vermellt, will Obama dat Verköpen vun halfautomatischen Sturmgewehren verbeden. He ünnerstützt darmit een Plaan för een Gesett vun'n Bunnesstaat Conneticut. Dar hett een Mann an'n Freedag mit een Sturmgewehr 27 Minschen ümbröcht. Veele Politiker vun de Demokraten un Republikaner harrn nah dat Massaker ehr Meen to de Saak ännert. Ok se foddert nu strengere Wapen-Gesette för Amerika.

Dat Weer

Un nu een Blick op dat Weer: in Cuxhaben 3, an den Bremer Flegerhaben, an de Fischereehabenslüüs in Bremerhaben un in Demhörst sünd dat opstunns 4 Graad. Hüüt is dat meist gries aver dröög, bi 5 Graad. Tokamen Nacht blifft dat ok meist dröög, dat gifft aver keen Frost. Ok morrn rekent wi mit een griesen Dag, man bit to'n Abend fallt woll wieter keen Regen, bi 4 Graad. Vun Freedag an kann denn Snee fallen un de Autofahrers mööt mit Glatties reken. Dat weern de Nahrichten op platt. Gerrit Busch hett se tohoopstellt. Op platt trechtmaakt hett se Heidi Jürgens.