Plattdeutsche Nachrichten

De Plattdüütschen Narichten vun'n 15. November 2019

Plattdüütsch Narichten vun'n 15. November 2019, [3:37]

Tweetet Leven för „Seute Deern“

Bremerhaben. De Entscheden för en Naboo vun dat Museumsschipp „Seute Deern“ kaamt mehrstendeels goot an. De Huushooltsutschuss vun´n Bundesdag hett güstern en originaal Neebo vun dat Seilschipp besluten. Dat ole Seilschipp warrt gröttstendeels afwrackt. Aver: Wenn´t jichtens geiht schallen vele Originaaldelen wieder brukt weern. De Bund stellt all tohoop 46 Millionen Euro för den Seiler un wiedere Scheep vun dat Schipps-Törn-Museum praat. Bremerhabens Oberbörgermeister Grantz fiert dat as Erfolg vun den Bremerhabener SPD-Bundesdagsafornten Uwe Schmidt.

Neet Forschungsinstitut för Ollenborg

Ollenborg. Üm wat över nee Verkehrsysteme ruttofinnen, will de Bund en neet Institut in Ollenborg finanzeren. Dat schall dorbi för allen um Fohrtüüg gahn, de nich mehr vun Minschen stüert warrt, sünnern vun Compjutersystemen. Mehr as söven Millionen Euro in´t Johr stellt de Huusholtsutschuss praat. Bit 2024 schallen an dat Informatik-Institut Offis üm un bi achtig nee Arbeitssteeden för Wetenschaftler upkamen.

Bundeshuusholt steiht

Berlin. De Bund schall ok tokamen Johr ohn nee Schulden utkamen. Dat hett de tostännige Utschuss vunmorgen na 17 Stünnen Beradens fastleggt. Plant sünd 2020 Utgaven vun 362 Milliarden Euro – binah söss Milliarden mehr as düsset Johr. Ok hett de Bundesdag mehr Geld för soziale Leistungen inplant. De Bundesdag snackt in de letzte Novembermaandweek över den Huusholt.

Klimapaket in´t Parlament

Berlin. De Bundesdag will vundag de Arbeit för dat Klima in Düütschland mit en Gesett to en Plicht maken. To dat Klimapaket vun de groden Koalitschoon hört ok en Pries dorför, dat Kohlendioxid in de Luft pust warrt, mehr Stüern op Floogtickets un mehr Hölp för Lüüd, de to ehr Arbeit na de Stadt rinfohrt. Gegen de Plaans vun Union un SPD gift dat Gegenwind vun de Oppositschoon un in den Bundeslännern. Dat kann angahn, dat de Bundesrat noch an de een or anner Stee wat ännert.

Nootstand in Venedig

Venedig. De italiensch Regerung hett na en Rekord-Hochwater den Nootstand över Venedig utropen. Twintig Millionen Euro schallen för de afsluuts nödigen Akschonen praat stellt weern. Dat hett Ministerpräsident Conte vermellt. De Stadt an´t Middelmeer liedt siet en poor Daag ünner Pegel, de binah twee Meter över normal liggen. Wiede Dele vun Venedig staht jümmer noch ünner Water, de Pegel geiht aver wieder torüch.

Dat Weer

Un nu een Blick op dat Weer: in Wildshusen 4, an den Bremer Flegerhaben un an de Fischreehabenslüüs in Bremerhaben 4 un in Rodenborg sünd dat opstunns ok 4 Graad.
Hüüt gift dat Wulken mit Daak in de hoge Luft. Af un an kann dat ok n´poor Regendrüppen geven. Dat blifft dröög bi söss bit acht Graad. De Wind weiht in Maten bit frischer un stark böiger Oostwind. Op de Eilands sünd störmsche Böen mööglich.
Tokamen Nacht blifft de Heven vull vun Wulken. An Morgen fangt dat vun Süden her an to pladdern. An de Küst blifft dat dröög. Dat Thermometer sackt op dree bit söven Graad.
Morrn blifft dat wulkendüüster. Ok warrt dat pladdern. An Namiddag und Avend treckt de Regen af. Dat Thermometer wiest en Temperatur vun fief bit acht Graad.

Dat weern de Nahrichten op platt. Gerrit Busch hett se tohoopstellt. Op Platt trechtmaakt un vörleest hett se Markus Weise.