Plattdüütsch Nahrichten vun'n 09. April 2014, [3:34]
Brüssel. De Westen stüert bi den Arger üm de Ukraine ok wieder en diplomaatschen Kurs. De EU-Kommischoon plaant: De Butenministers schöölt sik tokamen Week tohoopsetten. Mit an den Disch sitt denn de Europääsch Union, de USA, Russland un de Ukraine. Liekers: De USA kann sik nu ok vörstellen, dat ukrainsche Militär mit Wapen uttorüsten, dat dat Land en Attack afwehren kunn. Wieldes is de Laag in de Oost-Ukraine wieder nich in’n Griff. Opsichtslüüd ut den Westen meent: So keddelig as nu in de Ukraine is dat in Europa siet den Tweten Weltkrieg nienich ween.
Perth. Sööktrupps sünd in den Indischen Ozean wedder Signalen wies worrn, de vun de Boeing 777 kamen kunnen, de se jümmers noch nich funnen hebbt. Dat sä de Mann, de dat Leit hett vun de Sööktrupps. Nu hebbt se al veer Maal Signalen infungen, un se meent: Bilütten kaamt se den Fleger op de Hacken. Kunn ween un in en poor Daag finnt se al Wrackdelen.
Tokio. De japaansche Autohersteller Toyota haalt Millionen vun Autos trüch in de Warksteed. Dat gellt för meist 7 Millionen Autos op de ganze Welt – mehr as 92.000 dorvun in Düütschland. Bi dat Modell Yaris kunn dat Maleschen mit de Sitzschien oder de Lenksüül geven. Bi de Modellen RAV4 un Hilux kunnen Kabel breken, vermell dat Ünnernehmen.
Bremen. In Bremen gifft dat eerstmal kene nee’en Düütschkursen mehr för Lüüd, de na Düütschland kaamt. Dorachter stickt: Dat Geld ut en EU-Putt is all. Betnu is dat Programm för Butenlänners un Flüchtlinge vun den Europääschen Sozialfonds ESF betahlt worrn. In de Kursen kunnen de Migranten nich blots Düütsch lehren, nee, se sünd ok för’t  Arbeitsleven fit maakt worrn. Dat Bunnsamt för Migratschoon deelt eerst vun 2015 op an wedder Geld för dat Programm ut.
Bremen. Bi de Inklusion, dat heet: Kinner mit un ahn Behinnerung hebbt tosamen Ünnerricht, hett Bremen de Nees vörn. Bi en nee’e Ünnersöken vun de Bertelsmann-Stiftung is rutfunnen worrn: In’t Land hett sik bannig veel daan. Meist twee Drüddel vun de Schölers, de dat nich so licht hebbt bi’t Lehren, gaht op ganz normale Scholen, un nich op Sonderscholen. In Neddersassen süht dat ganz anners ut: Nich mal 15 Perzent vun de Schölers mit Problemen bi’t Lehren sünd op normale Scholen. Dormit liggt Neddersassen ünner den Bunnssnitt.
Un woans süht dat mit dat Weer umto ut? Opstunns hebbt wi in Bremen, Bremerhaven un Emm 8 Graad. Op Langeoog sünd dat 10 Graad. Vundaag vele Wulken an den Heven, mitünner kann dat ok schuern. Dat Thermometer schafft dat blots op 13 Graad. De Wind dorto weiht mit Maten vun de westen bet noordwesten Kant. Af un an blaast he ok düchtig mit Böen vun 6 bet 8. Tokamen Nacht treckt de Wulken blots hier un dor af. Denn un wenn kann dat ok wat Natts vun baven geven. Dat köhlt af op 8 Graad. Ok morgen hebbt de Wulken wedder de Bavenhand. De Sünn schuelt blots mal för en lierlütten Momang rut. Bi 11 bet 13 Graad kann dat jümmers wedder regen oder schuern. Freedag süht dat nich veel anners ut. Un dat warrt noch en beten wat köhliger. An’t Wekenenn: vun allens wat dorbi: Wulken, Regen, Sünn. Bi 13 bet 14 Graad. Dat weern de Narichten. Op Platt trechtmaakt un vörleest vun Christiane Ehlers. Tohoopstellt hett jüm Katrin Martens.
Kalender
Info: Plattdüütsch Narichten
Aktuelle plattdeutsche Nachrichten werktags auf Bremen Eins und hier für Sie zum Hören.
Sendezeit:
Mo. - Fr., 10:30 Uhr
Das Team der Plattdeutschen Nachrichten
Hier köönt Se sick de Lüüd ankieken, de Dag för Dag dat Niegste up Platt in de Welt brengt. Mehr...
E-Mail ins Studio
0421 - 246 611
Musikwünsche auf Bremen Eins
Überraschen Sie Ihre Mitmenschen mit einem Gruß oder einem Musikwunsch. Wir senden sie montags bis samstags in der Sendung "Grüße und Musik". Mehr...
Bremen Eins twittert
Folgen Sie uns auf Twitter und bekommen Sie die aktuellsten Infos über unser Programm. Neuester Eintrag:
Tweets werden geladen...
Webchannels
Beat-Musik und musikalische Schätze rund um die Uhr, wann immer Sie wollen, nonstop abrufbar. Klicken Sie hier für unsere Webchannel. Mehr...
Podcasts
Radio hören – wann und wo Sie wollen: Hier finden Sie eine Übersicht über alle Podcast von Bremen Eins. Mehr...
Frequenzen
Alle nötigen Empfangsdaten für den Empfang von Bremen Eins: Ob terrestrisch, per Satellit oder Kabel - hier bekommen Sie die nötigen Daten. Mehr...
Suche
Durchsuchen Sie den Bereich Bremen Eins nach Ihrem Stichwort:
Kontakt
Haben Sie Anregungen oder Fragen? Hier finden Sie Ihre Ansprechpartner bei Bremen Eins. Mehr...