Plattdeutsche Nachrichten

De Plattdüütschen Narichten vun'n 24. Juni 2019

Plattdüütsch Narichten vun'n 24. Juni 2019, [3:49]

Oppositschoon winnt Börgermeisterwahl in Istanbul

Istanbul: De Oppositschoonspolitiker Imamoglu hett de Börgermeisterwahl in Istanbul wunnen. De Kandidaat vun de CHP hett meist 54 Perzent vun de Stimmen kregen un liggt dormit düütlich vör den fröheren Ministerpräsident un AKP-Kandidat Yildirim. De Fehlslag vun Yildirim gellt ok as Dahlslag för Präsident Erdogan. Ehr dat Imamoglu dat Amt antreden kann, mutt he noch aftöven, wat dor ok nix dorgegen snackt. Na de Kommunaalwahl in’n März hett düsse Perzess mehrere Weeken duert un güng dormit to Enn, dat se de Wahl as nich rechtens verkloort hebbt. Dorüm is se güstern wedderhaalt worrn.  

Bunns-SPD stimmt över Verfohren för Vörsitterwahl af

Berlin: De Föhrungsgremien vun de SPD wüllt sik bet to’n Namiddag op en Verfohren eenigen, wo de Parteivörsitt nee bestimmt warrn schall. Ãœnner annern geiht dat üm de Fraag, wo de Liddmaten dorbi mitmaken schüllt. Ok nich kloor is, of dat en Dubbelspitze geven schall. Siet dat Andrea Nahles Anfang Juni ehren Hoot nahmen hett, ward de Partei kommissoorsch vun de Ministerpräsidentschen Dreyer un Schwesig un vun den hessischen Oppositschoonsföhrer Schäfer-Gümbel föhrt.  

CDU-Baas will Kooperatschoonsverbot mit de AfD

Berlin: De CDU-Vörsittersche Kramp-Karrenbauer lehnt en Tosamenarbeit mit de AfD düütlich af. De AfD treckt tominnst in Deelen keen klore Kant to Rechtextremismus un Rechtsradikale, säe Kramp-Karrenbauer in de ARD-Sendung „Anne Will“. De Partei würr dormit to’n Deel för dat geistige Klima sörgen, dat to den Moord an den Kasseler Regeerungspräsidenten Lübcke föhrt hett. En poor vun de CDU-Politikers in Sassen-Anhalt hebbt vörher seggt, dat se sik en Tosamenarbeit vun de Union mit de AfD vörstellen köönt.     

Bremer SPD-Fraktschoon wählt nee’en Vörsitter

Bremen: De SPD-Fraktschoon in de Börgerschaft will an’n Namiddag en nee’en Vörsitter wählen. De eenzigste Bewarver is de fröhere Parteivörsitter Bovenschulte. Vörher hett sik de langjohrige Fraktschoonsvörsitter Tschöpe nich wedder opstellen laten. För een vun de beiden Stellvertreder-Posten kandideert de Wirtschaftssenator Günthner. Gegenkandidaat is de Billungspolitiker Güngör. De twete Viez-Posten schall vun en Fro övernahmen warrn, betto hett sik aver noch keen dorför anmellt.     

Nee’e Henwiesen op fröhere RAF-Terroristen

Hannover: De Polizei in Neddersassen hett nee’e Henwiesen kregen, wo dree fröhere RAF-Liddmaten to finnen sünd. De LKA-Präsident in Neddersassen de Vries hett to de „Nee’en Ossenbrügger Zeitung“ seggt, dat de Saak opstünns nagahn ward. Anfang Juni hett de Polizei wietere Fotos vun de fröheren Terroristen Daniela Klette, Ernst-Volker Staub un Burkhard Garweg rutgeven. De dree ward naseggt, dat se in de verleden Johren mehrere Geldtransporte un Supermarkten överfallen hebbt.  

Dat Weer

Un nu en Blick op dat Weer: in Noornham un op Wangerooge 22, an‘n Bremer Flegerhaben 23, un in Bremerhaben un Ossenbrügge sünd dat opstünns 25 Grad. Hüüt gifft veel Sünnschien, en poor hoge Wulkenfeller un gor keen Regen bi 27 bet 31 Grad. In de Nacht hebbt wi wenig bet gor keen Wulken an’n Heben, un dat blifft dröög. Dat Thermometer fallt op 15 bet 19 Grad. Mörgen kriggt wi blangen de Sünn ok en poor lockere Wulken to sehn, de aver keen Regen bringt. Dat Quicksülver kladdert denn op 30 bet 36 Grad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Marc Gelhart.