Plattdeutsche Nachrichten

De Plattdüütschen Narichten vun'n 6. August 2020

Plattdüütsch Narichten vun'n 06. August 2020, [3:05]

Tall vun de Nee-Infektschonen kladdert wedder over 1000

Berlin – De Tall vun de Corona Nee-Infektschonen is in Dütschland erstmals wedder over 1000 pro Dag kladdert. Dat Robert-Koch-Institut hett siet güstern eendusend-45 nee’e Infektschonen faststellt. Dat is de höchste Wert över een Dag siet Anfang Mai. In Bremen blifft de Tallen dargegen recht mau – blots een nee’e Infektschon lett de Tall vun de, de nu krank sünd, op 65 kladdern. In Neddersassen sünd 46 nee’e Fälle darto kamen.

Kommunen meent, se sünd praat för een tweete Well

Berlin – Kommunen, Städte un Gemeenden meent, se staht praat för een möglich tweete Corona-Well. De Städte- un Gemeendebund wiest op dütlich mehr Labore hen, de Tiet för een Corona-Test hebbt. Buterdem geev dat orrig mehr Schutzmaterial un Intensiv-Bedden, so de Hauptgeschäftsföhrer Landsberg. Em is blots bang, dat de Minschen in Dütschland faken keen grodet Corona-Risiko mehr seht.

Internatschonale Hölp för Beirut

Frankfurt an’n Main – De internatschonale Hölp för de Minschen in de libanesisch Hauptstadt Beirut löppt an. Mitarbeiders vun’n Technischen Hölpswark sünd an’n Abend vun Frankfurt ut in Richt Libanon losflagen. Nah den beiden Exploschonen in’n Haben vun Beirut ward vele Minschen noch misst, mehr as 130 sünd üm’t Leven kamen.

Japan gedenkt dat Afsmieten vun Atombomben vör 75 Johren

Hiroshima – Japan hett dat Afsmieten vun de Atombomben vör 75 Johren gedenkt. De USA harrn an’n 6. August 1945 een Bomb op Hiroshima un dree Dag later een Bomb op Nagasaki smeten. Ward taxeert, dat dardör tohoopnahmen mehr as 200-dusend Minschen üm’t Leven kamen sünd.

Polizei kriegt Drogenfohrer op de A27 faat

Bremerhaben – De Polizei hett op de A27 een Drogenfohrer mit 200 Kilogramm Kokain faatkregen. As de Staatsanwaltschupp vermellt, weer de lüttje Transporter een LKW-Fohrer in’n Överseehaben opfullen, de denn de Polizei ropen hett. Een vun de veer Kierls, vun de se vermoden sünd, dat se wat darmit to daan hebbt, sütt nu in Ãœnnersökenshaft.

Dat Weer

Un nu een Blick op dat Weer: op Wangerooge 23, an de Fischereehabenslüüs in Bremerhaben 24, an den Bremer Flegerhaben 25 un in Ossenbrügg sünd dat opstunns 26 Graad. Hüüt schient meist jümmers de Sünn un dat is dröög, dar köönt aver ok een paar Wulkenfeller vörbitrecken. Dat ward bannig warm bit hitt bi 27 Graad op de Eilanden bit 32 Graad in’t Binnenland. Tokamen Nacht sünd meist keen Wulken an’n Heben ünnerwegens – dat Thermometer sackt op 18 bit 14 Graad. Morrn lacht de Sünn den helen Dag un Regen fallt nich. Dat ward noch een beten hitter bi 29 bit 34 Graad. Ok an’n Sünnabend ännert sik dat Weer meist nich bi 31 bit 34 Graad – an de Küst bi 29 bit 32 Graad. Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Heidi Jürgens.