Plattdeutsche Nachrichten

De Plattdüütschen Narichten vun'n 7. August 2020

Plattdüütsch Narichten vun'n 7. August 2020, [2:51]

Trump geiht gegen TikTok gegenan

Washington – US-Präsident Trump geiht gegen Geschäfte mit den Eegern vun TikTok gegenan – een chinesische Video-App, de bannig vele Lüüd nutzt. He hett Order for Sanktschonen geven un sien Naam darunner sett. Trump sütt na eegen Angaven in de App een Gefohr för de natschonale Sekerheit, wiel dat Ãœnnernehmen grode Mengen Daten sammelt. Dardör kann China de Amerikaner utspioneren, sä Trump.

Arbeider ward na Exploschonen in Beirut faatnahmen

Beirut – De libanesischen Ämters hebbt na de slimmen Exploschonen in de Hauptstadt 16 Habenmitarbeiders faatnahmen. Se schüllt för dat Instandhollen an dat Lagerhuus tostännig wesen sien, wo dat Ammonium-Nitrat, dat licht in de Luft gahn kann, lagert weer. Bi dat Unglück sünd mehr as 140 Minschen üm’t Leven kamen, üm un bi hunnert ward noch misst.

LKW-Unfall soorgt för Staus op de A1

Bremen – Een Unfall mit een Swienetransporter hett an’n Morrn op de A1 bi Bremen/Brinkum för een langen Stau soorgt. De LKW weer in Richt Ossenbrügg ümkippt, een paar Derten sünd over de Autobahn lopen. För dat Oprüümen mussen se de A1 in Richt Süden dicht maken. Een paar Stunnen hett dat duert, dat geev een langen Stau.

Karstadt in Bremerhaben gifft dat bold nich mehr

Bremerhaben – Karstadt ward in de Seestadt een för allemal dicht maken. Dat hett de Warenhuus-Kunzern de Stadt in een Breef schreven. To’n Enn vun‘n Januar ward Karstadt woll de Dören in Bremerhaben dicht maken. Bedrapen sünd rund 70 Mitarbeiders, för de een Transfer-Sellschupp inricht ward.

Langeoog blifft ok dütt Wekenenn dicht

Langeoog – Dat Nordsee-Eiland hett vermellt, ok an dütt Wekenenn keen Gäst totolaten, de blots een Dag blieven wüllt. Vunwegen dat warme Weer un dat dat jümmer noch Gefohr dör dat Corona-Virus gifft, gellt dat Verbott wieter, heet dat. För dat Wekenenn darop wüllt se aver Gäst wedder tolaten, sä de Börgermestersche vun Langeoog. 300 bit 400 Lüüd, de blots den Dag over kummt, köönt se sik woll vörstellen.

Dat Weer

Un nu een Blick op dat Weer: in Cuxhaben 23, an den Bremer Flegerhaben 25, an de Fischreehabenslüüs in Bremerhaben 26 un in Ossenbrügg sünd dat opstunns 27 Graad. Hüüt gifft dat wedder veel Sünnschien, dar treckt blots mal een paar lichte Wulken dör un dat blifft dröög bi 29 Graad op de Eilanden un 33 Graad in’t Binnenland. Tokamen Nacht is de Heben wieter klaar un de Sterns funkelt. Dat Thermometer sackt op 20 bit 15 Graad. Morrn gifft dat wedder veel Sünnschien un blots een paar Wulken. Wieter keen Regen bi hitten 28 bit 35 Graad. Ok vun Sünndag bit Middeweken veel Sünn, blots af un an een paar Wulken un meist dröög bi 30 bit 34 Graad, de de Küst 27 bit 29 Graad. Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Heidi Jürgens.