Plattdeutsche Nachrichten

De Plattdüütschen Narichten vun'n 12. Juli 2018

Plattdüütsch Narichten vun'n 12. Juli 2018, [3:25]

Trump verlangt wiederhen högere Militärutgaven

Brüssel: US-Präsident Trump hett nochmal de Utgaven vun de NATO-Länners bekrittelt. Op Twitter schreev he, en poor Milliarden Dollar bavento sünd nich noog. Trump hett ok Düütschland vörsmeten, vun de USA Schutz to kriegen, de Bunnsregerung gifft avers to wenig Geld ut för´t Verdeffenderen, meent de Staatsbaas. Bi dat NATO-Topdrepen in Brüssel hett sik Trump dorför insett, de Militärutgaven to verduppeln.

Mazedonien lehnt EU-Asylzentren in´t egen Land af

Skopje: Mazedonien hett kloor maakt, dat schall keen Asylzentrum vun de EU in dat Land geven. De Balkan-Staaten köönt dat nich maken, denn se sünd nich Deel vun de EU, hett de Butenminister vun Mazedonien, Dimitrov, seggt. Bi dat Drepen vun de EU-Binnenministers in Innsbruck will de öösterrieksche Minister Kickl vörslaan, Staaten buten de EU schüllt freewillig Zentren inrichten, wo Migranten trüchgahn köönt. Mazedonien un ok Albanien sünd avers dorgegen.

Füer in en Dackstohl maakt Huus heel un deel twei

Bremen: In Gröpeln is in de Nacht de Dackstohl vun en Wahnhuus utbrennt. All Lüüd, de dor wahnt, kunnen sik ut dat Huus mit twee Etaaschen redden. Twee Minschen sünd nu in en Krankenhuus, denn se hebbt vun den Rook wat afkregen. De Füerwehr muss Delen vun dat Dack wegmaken, üm dat Füer in´n Griff to kriegen. Nu is dat Huus heel un deel twei, keeneen kann dorin wahnen.

Kroatien un Frankriek in´t WM-Endspeel

Moskau: För Kroatien hett dat slumpt. De Football-Mannschaft steiht bi de WM tosamen mit Frankriek in´t Endspeel. Kroatien harr güstern Avend gegen England mit 2:1 wunnen. Dat is nu dat eerste Mal, dat Kroatien bi en WM-Finale dorbi is. De Trupp speelt an´n Sünndag in Moskau gegen Frankriek – Klock söventeihn fangt se an.

Werder fangt wedder mit den Training an

Zell am Ziller: För Werder Bremen geiht vundaag dat Training los för de tokamen Bunnsliga-Speeltiet. Se sünd in Öösterriek tosamenkamen. Trainer Kohlfeld will dor mit en Utwahl vun 26 Speelers arbeiten. Se blievt dor in Tirol negen Daag. Op dat Programm vun de Kru staht dree Testspeele, ünner annern gegen den 1. FC Köln un gegen den MSV Duisburg.

Dat Weer

Nu kaamt wi to dat Weer: Opstunns hebbt wi an´n Flegerhaven in Bremen un in Emm achtteihn Graad, in Bremerhaven un Ollnborg sünd dat twintig Graad. Mag ween, dat gifft to´n Deel en poor Schuern, anners kummt de Sünn rut oder se is al dor. Dat blifft dröög bi maximal sössuntwintig Graad in Bremen. De Wind weiht flau oder mit Maten vun de noordwesten bet noorden Kant. In de Nacht sünd ok Wulken ünnerwegens oder de Steerns funkelt an'n Heven. Later in de Nacht gifft dat Dies un Daak, mit Regen is nich to reken. De Temperaturen gaht trüch op föffteihn bet twölf Graad. Morgen is de Sünn wedder da, mag ween för teihn Stünnen bi fiefuntwintig Graad. Ok dat Wekenenn is mehrstendeels hell un kloor, blots mit en poor Wulken. Is denn ok so warm as nu. Dat weern de Narichten. Op Platt trechtmaakt un vörleest vun Holger Zantopp. Tohoopstellt hett jüm Carola Schwirblatt.