Plattdeutsche Nachrichten

De Plattdüütschen Narichten vun'n 6. September 2018

Plattdüütsch Narichten vun'n 6. September 2018, [3:25]

Maas stellt Hölp för Flüchtlinge in Utsicht

Ankara: Düütschland hett de Törkei Hölp bi den Ümgang mit de syrische Flüchtlinge toseggt. Wenn dat in Syrien wedder to neje Kämpfe kummt, will Düütschland jüm dütlich, mit humanitäre Hölp, unner de Arms griepen. Dat hett Butenminister Maas bi sien eersten Amtsbesöök in de Törkei kund geven. De törksche Butenminister rekend mit Flüchtlinge ut de syrische Gegend Idlib, de in de Törkei flücht. Idlib is in Syrien de letzte grote Region, de noch vun Rebellen kontrollert ward. De syrische Armee makt sik jüst praat för eenen Attack op düsse Gegend.

Seehofer wiest Verständnis för de Demonstranten in Sachsen

Berlin: Na de Proteste in Chemnitz, de gegen allens wat frömd is weern, hett Binnenminister Seehofer, as dat schient, sien Hand över de Demonstranten hollen. De „Welt“ seggt, dat he de Migration as „Mudder vun alle Probleme“ nömt hett. He versteiht, dat sik de Lüüd böös opregt. Man dat makt se noch lange nich to Nazis. Achter dat doot maken vun eenen 35-jöhrigen Düütschen sünd in Chemnitz veele Lüüd gegen de Rechten op de Straat gahn.

Twee Minschen bi starket Bevern vun de Eerd doot bleven

Sapporo: Bi een starket Bevern vun de Eerd, in´n Norden vun Japan, sünd tominnst twee Minschen doot bleven. Mehr as 120 hebbt sik wat doon. Dat Beben, op de Insel Hokkaido, harr eene Kraft vun 6,7. Veele Hüüs un Straten sünd dorbi to Schaden kamen. Üm de 3 Millionen Hüüs un Wahnungen harrn keen Strom. In een Atomkraftwark hebbt se een Afklingbecken mit Notstrom för de Kühlung versorgt.

Vodafone will as dat schient de Versorgung vun´t Mobilfunk in Neddersassen utboen

Hannover: Dat Land Neddersassen will de Versorgung vun´t Mobilnetz verbetern. Dat Land will, as dat schient, mit Vodafone tohoop arbeiden, seggt de Nordsee- Zeitung. De Zeitung will dat höört hebben vun den neddersässischen Landeswirtschaftsminister Althusmann. Vodafone hett vör, in de tokamen twee Johr, 100 neeje Antennen för den Mobilfunk in Neddersassen to boen. 600 wietere Antennen schüllt nakamen.

Mitarbeiders vun Mercedes ut Bremen kriegt to weten wat weniger to Maken is

Bremen: In´t Bremer Mercedes-Wark is hütt Vomdag eene Versammlung vun alle Mitarbeiders in Gang. Dor kriegt de Arbeiders to weten, wat dat mit de plante Kürzung bi de Produktion op sik hett. Mercedes will pro Johr 20 Dusend Autos weniger boen. De Grund doför is, dat na de Autos weniger nafraagt warrd. Man de IG- Metall meent, dat nüms op de Straat sett ward.

Dat Weer

Un nu een Blick op dat Weer: An den Bremer Flegerhaben, an de Fischreehabenslüüs in Bremerhaben, in Syke un op Langeooge sünd dat opstunns 18 Graad. Hüüt schient erst noch de Sünn, man to´n Middag hen treckt vun de Westen Kant mehr un mehr Wulken op. Dat kann so´n paar Schuers mit Blitz un Dunnerslag geven, bi 21 bit 27 Graad. Tokamen Nacht wiest sik de Heven wulkig, Schuers mit Blitz un Dunnerslag sünd mööglich. Dat Thermometer sackt op 15 bit 12 Graad. Morrn dichte Wulkenfeller. An de Küst meist Regen. In´t Binnenland kiekt de Sünn ok mal rut. Dat blifft meist dröge, bi 18 bit 21 Graad. Ok Sünnabend veele Wulken, an de Nordseeküst möt wi af un an mit Schuers reken, bi 19 bit 21 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Antje Kruppa.